Kama Patso Rithoi|Inpui (Kabui)

Heiba rithoi ya sangwan kumgon tanbi innkarao tunu rithoi diga patso rwanna thoi ong ngaak nu we.

“Aniya lumik swak kashani khouring kasa kailuga pupi rwanding thou kalum kaba kareh. Heiba innkhun bi pupi rwanding zulou thou koulo kareh, rangkhangpa hung zulou inkam mo. Heiba pu patso bazo wo, heiba pu bazai bazo wo, heiba pu naosen bazo wo, heiba pa patso bazo wo, heiba pa bazai bazo wo, heiba pa naosen bazo wo, heiba banu naosen bazo wo.

Heiba bamilun thoucha hunglune heiba bamilun thoucha hunglu dabe, heiba kapaisa cha hung lun. Hei kanat karangnu cha hunglune. Hei kamaisa cha hungdabe shisang senrui kaiman katinu aantem bwa dannu cha hung biyo. He basen thouduan bung lune. Basen thouduan hung ru dabe. He Amang sen nunza cha hung zabiyo. Heiba babok thouduan thou lune. 

Babok thouduan thou lu dabe. Sanun nun deiza chabiyo. Heiba kaan thouduan thou lune. Heiba kaan thouduan thou dabe tangza nun deiza cha hung biyo. Heiba aan thouduan thou lune. Bakrik baancha nun deiza cha hung za biyo. Heiba uih thouduan thoulune. He tangza nun dei za cha hung za biyo. Heiba louchwan thouto thou lune hei batachi thou thang thalu dabe bakamong thouta thou lune. Heiba ba –inbwa thu lune. Anam karingnu danno za biyo. 

Heiba barai thou brai thou lune. Barai thou brai thou ludabe thamrwang rai tia cha hung za biy. Baswak thou swak thou une. Baswak thouswak thou ludabe. Sentak kamei bomtia cha hung za biyo. Heiba lou thou aat thoulune. Balou thou aat thou ludabe. Heiba basangla thou thang talu dabe. Baziten khopthang za biyo. Heiba pangbut thou khon thoulu dabe. Ba pangbut thou lu thou khon dabe lungkra rongza thoulu thoukhon swak cha biyo. Balou thoulak thou ludabe. 

Heiba bakan thoukabai thou ludabe kaphuk latza kaphaan latza kabai kazei la za biyo. Heiba baroksi thouthang talune. Baroksi thou thang talu dabe. Heiba kra thoukra thou lune. Bakra thou kra talu dabe. Kano bakhai nudan baliam bakhai nudan tabasen pek kalam nudan za biy. Heiba babaan thou thang talune. Babaan thou thang talune. Babaan thou thang talu dabe lukzang maitia cha hung biyo. Heiba ba banra thou thang talune. Ba banra thou talu dabe. 

Rampwang ke baza tiacha hung za biyo. Heib kathing thou thang talune. Ba kathing thou thang talu dabe aanmu batha tia cha hung za biyo. Heiba bala thou thang talune. Bala thou thang ta ludabe. Babalum thou blum thou lune. Balum thou blum thou ludabe bachanwei katwang nudan za biyo. Bakra thoukra thou lune. 

Heiba kra thou kra thou luda be annlungkra kra nudan za biyo. Bapaan thou paan thou lune, bapaan thoupaan thou ludabe, insi kaswaknu dan biyo. Hei ani lumik swak kashani dani ding mipu kashou ngam larwe rangkhangpa hung zu lou ingam mo.”

The text is taken from “ The Origin of Inpui Tribe & Their Culture” (2010) by K. Andrew Bariampaan. Pp 74-78.