The Boy who Cried Wolf|Old Tale with a Regional Twist| Inpui (Kabui)

Image credit: Tes Teach

Kama na na namla nu inmwan khat pi zaosian nu katang pa khat am ngaak e.  Bameng Tusiatklok diga kou ngaak e. Maan naosen balei na mi thiaam theinu choung karwak natnu maktabe mi khat ting takhwang baatnu manpa khat tu ngaak e. Inmwan bi mi katam na ba lamchat sia briak pina kriangnu le tom ngaak e. Heiba inmwan na zao khatle ken tamnu inmwan ne. Inkhun bing na zao maktabe ken tamga dwan kale ye. 

Atiyeda bani na ba om ba om khouring ding bapu thei ye khatle rwan om potchei ding lou kale ga lung mak e. Inmwan na dai bazaang ngaak e atiyeda  inmwan ga kamaang nai dom ngaak rwe. Kamaang  liannu nai briak pina nilai khouring le tamga inmwan la swak ngaak e. Takhu khatle lousa ui maktabe ken khatle zao namsa ngamnu khouring tamga le swak ngaak e. 

Atibriak pina inmwan sa bing na bani kana brak ka lung ong ngaak e. Atiga pakhat na takhu swak ong rwe maktabe lousa ui swak ong rwe diga pao rwe be mibing pak kadoi hung lu haba khouring ding tuthak ka ong ngaak e. Kani khat Tusiatklok ba zao rwan ding kalwang luga ramwan basaangnu riakla louna sanu zong ga se ong ngaak rwe. 

Maan ramwan basaangnu chung bi ongnu baphaap sega ong ngaak e. Barang tuza ong sia thou rwe atibriak pina na maan lungning zaat zaat kakhan thou rwe. Atiga kamak kamak kakhan ongbi ba lungning bi mi nun ding thiaam nwamnu lungning sat zok zok swak rwe. Maan na bazao sian ongnu ramwan kom bi louse ongnu mi tam ga mu rwe. 

Harwan ding ga lao phaang nu rwe diga kakhan rwe. Atiga maan ba ramwan bakatong kasa bi kahan luga balaoga pao “Takhu swak ong rwe, Takhu swak ongrwe. A om zao nam sa loi dam ding rwe” diga chap ka pao rwe. Heiba khwan kabaang ongnu ngai su nu kaan bi lou bi se ongnu patso rwan bing kartoosh, chem., katu khatle thing rwa choilu pak hung rwe. 

Maan na pao ong nu riak pi hung phaang da maan ba lungchung bi ongnu baraang tuza balou luga nungai ga ong ngaak rwe. Bazao rwan doi le tim sa rip rip ong ngaak rwe. Inmwan patso rwan na takhu zuba ngai da takhu swakna nudan chuna pao nu zwe diga thiaam rwe. 

Atiga patso rwanna balumsa mak ka takhu zo ingai pek swak nanu bo diga tak khut nu kaan bi haba katangpa na ei ong sia chuna nani ding thiaam taan nu zwe diga bala khe khe ga katak kadou rwe. Patso rwan bing ga balungpwan ga “nang mitak mak ;air we, nating be takhu na nam sa dam ding ngo” diga kabia thang lug a balou balou baloi lat ngaak rwe.

Image credit; Tes Teach

Kanikhat Tusiatklok ramwan lanla bazao ding kalwang ga se swak lat rwe. Maan na habani mang sia ga se swak ngaak e. Bamang la maan na kraan bi na pak dwak ngam mak ka thi thang nu mang man rwe. Maan na basung nung ngai makka seswak rwe. 

Atiyeda tamang mang zwe diga ningluga bazao ding taram kasa bi bathan thang lu maan ba nilim thweibi in ga ong ngaak rwe. Maan la thamlai in thi sut tanu kaan bi bamang la kraan tunu mang ga in man lat rwe. Maan na mi rwan kraan bi na paak lu kachi ga pao ongnu inman rwe. Tusiatklok balao ga meng thou da bazao rwan ding takhu doina baang ga namthat sat ongnu mu rwe. 

Maan na balao lai lai ga “Takhu swak ong rwe. Mibing hung ingam mo. Azao nam saloi dam ding rwe” diga chap ka pao rwe. Atiyda lou bi se ong nu maktabe bakhwan ngaisu nu mibing na heiba manpa bachwan maak ka pao thou lat ong rwe diga khatchale balumsa mak ngaak rwe.

Atiga habani barang tuza takhu ding kazun katat ngaak rwe atida takhu banun sa lu haba katang pa ding tang ga namsa dam ngaak rwe.