Hounanu zwe, Bahousa zwe (Dancing Monologue Series)

Image credit: Free Vectors

Talei rambi lung hung nu heiya baram khat pa amda lung hung nu we. Aniya ringnu pot khat khat tuga lung hungnu heiya bakaba khat khat amgaak ne. Nang eina theimak nu le zaye. Atiyeda kanikhat mak peida kanikhat ani lang pithang nu baka ba ga zongsu lang tuzo. Misa ya kanikhat thou rwe ningting khit khit kaye. Kama ba taleiya inpek/bazwan ze diga tamga rin ngaak e. Intun ba talei kabaang nu we diga lou kale rwe. Heiba misa ningting nga inphin khit khit kaye. Talei chung biza mak ka saangbaan la amnu potchaat bing dingle zong swak ka ongrwe. Talei thwei , kabun lakpi maktabe samudru tui thwei tang ga misa na zong ga ongme. Ningthian (scientist) rwan na rinne kin khat khat ningting nu le inku kay diga rinne. Intun ningthian rwan mak tabe koicha (research) tu ongnu rwan na kani khat thou potchaat kathan zong su we maktabe bacha swakka ongme. Heibing nga into ga swak ongnu bo dinu ding mitam ga zong ongme. Karingnu khatle kathi nu pot a ningtingnu kuthiam (intelligent design) me diga kathei nu rwan na rinne. Ningting nu kuthiam puba zo tubo diga tangai tamga le ngai ye. Intun tun le heiba tangai ya tamga ngai ong maang nge. Ani Christian katamna ba Rikrwang na dam thang nu we diga lou we. Ani misa ding Bible nung suiga Eden ankwat pina lung swak e.

Kama kaan ba misa khatna lungnu wa sangwan raza sakla baitak ka lung nge. Sangwan raza inpaang hennu meiri hakna amme. Atiyeda intun ba sangwan raza hen nu tomga swak e. Mi katamna sangwan sung kariat khatle sungkakwa bi loi ye. Misa sangwan heiya ani kut pi maak e. Misa om ringnu basei ya ani misa na choi indin ngam mak e. Bahou basa tuga hungnuwe. Nang Rikrwang ding baputhei le baputhei mak le na om aom kumma loi hung damzwe. Bahousa ya tuna choinu bo diga le ngai za ye. Rikrwang ding balumsa zuba ringzok nu amrwe. Heiya ani balumsat nung sui nu ye. Eina heiba chuihiak pina rin nwam nu ba ani batak khatcha lang za lungnung zwe. Heiba bakaan ding ani bachaak theiga lungzo diga rin nwam nu we.

Phaang bacham zo!

Nang misa toga pon hung mak ngaak e be.
Nang tinu zo am ding bo?
Ringnu kaphuk hung kaisu mak ngaak ebe na katha ingai am ding bo?
Nakatha (spirit) hakna amding bo?

Misa tuga lunghung nu heiya bachan sanu we louthang zo.

Heiba kumbi anina kangam nu bing tulang le karam zo.

Misa bingna lungsa nu inkhun bi pon thang mak e.

Misa bingna krwang inkhun bi pon thang maak e

Maktabe daibazaangnu tamram bi ponthang mak e.

Haga dan mi kasem na lungriangre nu inbi

Maktabe kraan saraan nangnu riak pi pon thang nge.

Heiya bahousa zwe.

Kanikhat kana kale ga choungtam/kamai kale,

Kanikhat kriang kale.

Kani khat lungsia, kanikhat lungsa nu

Kanikhat choung natnu, kanikhat choung banem nu.

Kanikhat kriangnu, kanikhat batannu.

Kanikhat karo, kanikhat losia nu.

Kanikhat khwasun, kanikhat khwasa.

Kanikhat thapaan, kanikhat thathit.

Kanikhta kadou, kanikhat kapaang.

Kani khat lou baat, kanikhat lou aat.

Kanikhat losia, kanikhat karo nu

Kanikhat kazaknu dou, kanikhat maisa nu dou.

Kanikhat louna inbwa swak, kanikhat chaanga chunta.

Louthwan swakcho khwazin tanu le houna nu zwe.

Kanikhat laa to, kanikhat sungtam ga kakou nu.

Kani khat se swak, kanikhat han hung.

Kanikhat tong, kanikhat braaan.

Kanikhat bacha ka, kanikhat kairai tanu.

Kanikhat reipaan, kanikhat reichun.

Kanikhat bina hapta, tha, sangwan diga thou pei pei dam rwe.

Lungnu sangwan na tom khit khit…

Alaang phang mak e.
Ei riangre dom rwe.

Alaang sia dom rwe diga lung ong lang mak e.

Bakaan badat amnu zwe.

Sungtam mak o,

Rangre nuga soi makka khan dam zwe.
Kanikhat pon thang kanikhat thinu

Houna nu zwe.
Bahou sa zwe.