Asung Choung|Khangrinba Bryampa|Inpui (Kabui)

image credit: Pexels

Baning phaang da kama arwei kriangnu meiri;

Khwasei asung bi katip thang ungnu lwanri.

Rai bathei thang lat nwammai hungtang lanu lwanri;

Abrilu kumeini na khou.

Atida lwaang thou lamnu tui blat lat maknu dan

Thou trwe asung choung rai thang loi makka.

He thiraang ngo, rinthang ngo kriangnu khou

Banim ma-ai aniya le arwei lwanriga.

Takaan kaga khumbeng braam ngaisu bi

Baningsuwe arwei sung kazonnu kaan.

Braamzaangnu baringou braam ngaisu bi

‘Ning thuk ranne asungna nating.

Lamphaang ungmai ani'tangga asungna nating,

Han hung latding dan nang, apam bi.

Chwei lamnu rei, paansok lat maknu dan

Thou trwe kriangrui chatka akhouna.

Bwakaanpha hung ga thingna-louna bi ‘bwa han lat-eh

Atida chat lamnu kriangrui bazik kasat lan rwe.

Laasanu ngaisuga kriang nge;

Meiri sanu ngaisuga bathai ye,

Atida habing ding mabi nangna inku we.

Atida chat lambiga arwei kriang

Ka-ow thang lang maaknu aanswanza dan alosia.

Losiaga ei ramphaang se ungbi

Reibwa sanu rwanna ating ka-ow thang.

Za thangnu kaan amme bi

Paancham lat cho reithao dan thing kapou khat zabi.

Khangrinba Bryampa is an emerging Inpui poet from Bakuwa village.

The poem first appeared in Kala-Khwanbaang, an annual publication of Inpui Students' Union, Delhi (ISUD), 2019.