Sungtamnu Katang|Poem

Image credit: Thegardeninspirations.biz

Sungtam mak o reikwat bi hanlu.

Kazak maisianu thot phun mak riyo,
Rei paan ongnu ding phaangluga.
Karo banui kadou lang nai rwe.

Rei ding ba kriang ngo,
Paan lam zwe na om ankwat pi.
Bwakaanpha ding zo ngaak o.
Ngaak ngam mak  laga
Louchun sanarei ding ba kriang lune.

Sunpha gale bakhwasei maknu zung nge. 
Katangsaba sungsei ga ngaak ong ngo,
Bwakaangpha hung ding bi thiraangle nat chwe.
Tiyeda kachi mak o
Lumik kathan swak pi
Rei bachup swaklu
Talatna zwang kabet onglu rwe.

Phaang ngo innai ankwat pi,
Phaang ngo namnai ankwat pigale.
Tiyeda kriangba theithang ngo heiza be
Reibing ding sa rwe swanno,
Tiyeda rei ding tu riang re mak o.
Thiaksat mak o rei bachupka
Reipuba muwe be balungmak lune.
Lounwam mebe reipuba khou
Kachaak kaphut choiga taluga taga ni biyo.

Heile theithang ngo!
Nangna batanga kasit tumdamnu reiga
Babwa swak lam zwe.
Nangna moksatnu reiga
Kamong taluga bwakaanpha bapaan paan lam zwe.
Reiding rai san ne.
Reiding rai san ne.

Kama apuna rinthang ngaak e

"Athoiba nangna reisanu zong ne be,
Lumikswak pekla kanei yo.
Hala tuipwak sazwe ,
Hala reibwa le sazwe.
Nangna reipuba khou hung nge be 
Napu ameng rinlu ngai yo".

Zingpha mangsanu manlu

Anu bulum salu kumeini nating zong hung nge.
 Reikwat sabi paan ongnu lumikrei
Nating bachun ga hung nge.
Nating bri ga hung nge.
Natingza bathaiga hung nge aniya.

Basaangla lumik ka sakhi ye.
Talei bi lungpui nale theiding ngo.
Akriang na laang balaan swak e.
Louthou ngo le rin ngam laye.
Hung nge aniya kriangnu sungphun ga heiba reikwat sabi
Laa kasa le tuthei mak
Reisam kasale pwak theimak 
Asungza phunlu nating bathem lang hung nge.

Eibe na laang kachaak kai piyo ngam laye.
Kriangnu sungza phunlu hung nu we. 
Ngaak ongne heiba lungchung bi
Zingtale nangna kataknu cham ngaak ka.
Ngaak ongne zingpha insi ding phaang lu
Bachak ne natingle basaangla insi ding dan
Ngaak ongme zingpha thabaan rei banamsanu thiraangbi kabin hungbi
Latswak o na sung  inkhaanga
Na laangna akumle kat thang ne ong me.

About the Poem:

This poem was written on request. Inpui katangsanu khatna basung tamga rangaak hweinu reisam khat hiakthang ngo  diga rinhung ga hiak thang nuwe. The author just used his imagination and imortalized his feelings for ages to come. This was written as WhatsApp conversation and reproduced as poem with some fine tuning.

I hope you like it.

Thank You!!!