Ei Chap Ongba Inphana?

image credit:wallpaperup.com

Talei misa om ningting, lungning na rintang, kakhan tang ngam lanu heitya sadamnu Rikrwang om kuthiam tasiatnuye. Da’ damnu lakpina bachansia kataknu zo ei to ong ngak rwe. Heitya lian damnu Talei chung bi arang tuza khat chale tothang lang briak theimak….! Pa-am choung kabia langbo aphaap swak mak! Kalonu dan chunto-losia, ashung riangre ga salang-inlang theimakka, amikthina tambu zingnu dan, aketkaam kaam thang lang bariak theimak! Inlam selangbo ei na sedingnu riak cho? 

Ohh…! 

Alaangbe lumik swak maknu dan, aluchung bi zingnu na sip, badat-bakaan dinu maaknu dan, chunto-losianu mikthi na aluchung zon-ga, zingpha thamlai theimak. Inpha na ei chap ongnu, braan langbo? 
Khwazin taga ba-om, ba-om chwan loi luga ba-in-ba-in baloi thouloi darwe, khumpui-khumbeng bram balungsianu baram inza, takhao-takit rwanna nang zo narang tuza ong lang maangbo, inlam selangbo ngai ongnu dan! Zing khit-khit tarwe alampui zing rwe, alampui briak theimak, arang toza ramhaang bi sethang lang briak theimak, mikchonu dan kalouga se ong! 

Ei thiding dan riangrega kakou ong beida, ating kaithang, kalwang thang dingnu mi khat chale maak hei talei chung bi. Chap pennu le maak! Alosia ga chunto ongbi…! Apek lengga anung suithang dingnu mi tu am bo? Pakhat chana le nang riangre tak ong rwa, Pa-am into gabo, ngai thang, kabia thang dingnu zo tubo? Talei chungbi alaange dinu khat chale maak eh. Oh!!!! Abachan siat ah nu! Upai maakka arang tuza losiaga chap ongbi, Choung swak kamaknu, kathaa phun kamaknu a-om Rumaan swanza na abaan toga nang pa-am toga losia ongnu bo? Bathem ga kapui thang, amikthi nunsat thange. Oh! Peitya le bachansianu rubo? 

Talei bi phaangsa damnu pot, siantui-sianlan, nungainu inza na ating khat chale pikaro thang ngam mak eh. Riangre losianu talei ram bi chapnu mikthi na amadon toga! Inphaa na karonu, banui zum-zumnu zo lousu lat lang bo? Maktabi chunto losianu bing braan lang bo? Heitya khaadamnu mi kriangthei kamaknu talei ram bi ating pai pa am lang ponthangnu bo? Baning ngam mak eh. Lung ong nwam lan rwe hei talei ram bi. Ating pai ponthang mak ngaknu ye dabi peitya salu ding bo nuh? Tuipui kwa na lwang chat makka lwang ongnu dan amikthi le hunnu kaan amlat larwe. 

Ohh!...!! 

Sanu ding mule losia ranne, sianu ding mule henga chuntoye, chap nwam ranne. Hen-ga kakhan ne hen-ga losiaye pa am tolang bo ei zo? Aphaap khat chale swak lan rwe.  

Tubo abaan kakungnu zo? Tu am maang bo ating kriang thang dingnu zo? Tubo a om potrit sui phun paang thang dingnu zo? Tubo ashung riangre suithei thang dingnu zo? Tubo ei chunto-losia ongnu ding puithang dingnu zo? Tubo amikthi kanunsat thang dingnu zo? Tu am bo ashung riangre kakou thang zanu zo? 

Ohh! Arang tuza?...!!!!  

Bakaan lumik inza thou darwe, mikaan inza lung hong darwe, mikin inza lungmut tarwe tida karo daibazaangnu khat chale lousu ngam mak. Talei taki bali lumikswak, lumiktaak, kathweikasak, tuite-tuina pakse ga karonu zo inlam am bo zongse peida khat chale phang ngam mak. Inlam bo he karonu nang zo? Tu am maang bo nungla alaang karo lozaangsanu pithang langzo. Taraan ga phaang ongme ashung mikna, inphaana louthwan khawabaan swaklang maang bo?

Ngak ngam lan rwe khwabaan swaknu ding. Ngai ongme khwabaan swak langzo nai mak aangnu zong bo? Maktabe khawabaan swak makka zing khit-khit khut lang maang zong bo? Chat makka ta-ngai ngai ongme ashung kalim lana, daibazaangnu, karonu zo inlam ambo? Tu khou na lousu lang bo? Ating bathan thang luga inlam sedamnu bo? Karonu daibazaangnu zo lousu lat la dingnu ru bo? 

Louthwan khwabaan swaknu ding lamphaang ga ngaaknu dan, Basa rwan na banu tham phun hongnu ding ngaak ongnu dan. Nungla hongnanu baan rwan na daibazaangnu, karonu phun hongnu ding lamphaang ga ngaak ongme. 

Kalak maknu ngam mak eh, talei bi karo lozaang saga, nungai ga se ongnu rwan ding munu kaan bi! Ei phaang ngam mak eh!....!! Tu am bo ei dan-ga baningnu thung makka, losia chunto ongnu! Hongo aroi-unao kasa-kasia kakhan bacham zo. Pa am rih na arwei unao ding zo damnu bada bo? Rwan na phang kamaknu riangrenu, potrit arwei luchung bi tathang ong bazo? Nang arwei zo talei misa lakpina teilak-laknu khouring bada rubo? Pam to bada arwei unao za losia-chuntonu phang ongnu bo? Tudannu khat na saga ong ambo ngainu kaan bi pa am choung na katak lang bo? 

“Katak ngam mak eh amikthi na makka.” Nungla hong dingnu mikaan khat lana ngai ongnu tangai bingga aroi saruk toga katak thangnu to dam dingro......

Ei chap ong ba inphaa na?

About the Author:

Nk. Greenson Kaiphun-ga is currently the Pastor of Inpui Christian Fellowship, Delhi (ICFD). He has also written a book titled "Inpui Naga Folktales, Thouchiak Thoucha Kama Pupi Meiri" 2013. He writes on topics such as family issues, tragedy, and nature. He has also written drama/plays, poems and articles on the aforementioned themes.

He can be contacted at greensoninka@yahoo.com.