Kwanpin Zwaang Thou da Rwe

 

                                    Image courtesy: Deccan Herald

Thiraang na chong thethe kathui nu dan!

Louna na kaling sweiswei- thingna chaan na talei bi chunta thou ung rwe.

Bakhwa na misa sung theinu dan! Bahousa na misa lungning thei nu dan!

Louthwan dai dwakdwak swak rwe. Khwazin tale sikpha kaphuk phun hung rwe.

Takaan ka na rwe.

Loumi le lou aat kakam loi hung rwe. Saangkra-loukra le innta bi pei sip thang ung rwe. Ani saangkra sale, ani loukra siale-kum kum om ba chan zung rwe.

Ani inmwan inmwan bing bi bangei-bangui khatle thou rang thou phik na rwe.

Tokra kung bi maktabe taswei kungbi khumpui khumbeng ga le braam lan da rwe. Zingpha thabaan sa bi khoutun laam nu ga le lan da rwe.

Ba-an nu taram ga bachu kale swak rwe.

Ani talei kachaak taram dan gon swak rwe. Bakra lwak zanu saangkra mwan dan swak rwe.

Lumik le louthwan bangiam ban ban swak, thamlai nisat banou nu lai ga inn mai lungpeng bi inmwan om khatle innai lounai om meiri rainu kaan swak rwe.

Heidan nu kaan bi naosen kaan ding baning su we!

Nuh na bu som thangnu sanu, loulak la basa balao ga lou rung senu, kamaang lakla basa ba-oi senu, lou lampui la nupa ding pot twak senu, patso rwannu nung kongkara karek se nu, khatle apuh le apih na meimang kom bi kama pupi rwan meiri raiga khatle kama bani lung thounu meiri ding ntun le rin bachak ga rai ung ngaak nu ding baningsu han lat e.

Baning su we basaangnu ramwan chung bi, bathiangnu saangbaan haangnu lak bi aanmu na zwaang basaangga zwaang ungnu ga!

Inmwan bi sikpha reipaan rwan le paan swakna rwe.

Teina na le bazi inn lusip bi ba kabu ding ngaakka misa lang lan kazin ne. Khwazin babaak le kazing nu ding zongnu dan zwang ungnu mu ye.

Bakaan khatle bakhwa ga kale swak ngaak le anina thei thang damnu khatle mu thang damnu ding ani banim mak e.  Patso rwanna meimang kim bi ung lu raaktaan phannu ani mik bi mu tingting nge. Sangwan louchwan tok kakam hung loi luga bani kumthang lang khwakaan sabi ruirwa choiga chamdaan ga lung hung nge. Bani chwan basak mak e. Bani kuthiam sa khit khit e.

Nuh na pwanla tonu sui phaang nu mi am bo?

Takaan ka rwe be ntun khatle nung la basa-banao rwan rwan riak maktabe khang riak khut za lang diga pwanla kungga to we. Nuh khatna basa rwan lang sung riangre thangnu khatle kat swaknu meiri ani sui thei lang bathaang lianne.

Patso rwan meiri le rai chat mak e. Ani le ngai lang taraan ingam zo!

Kama inn mai bi khusa hungnu meiri khatle inzou la khu tamnu meiri! Kabom le kazuk kaap hung luga innai inkhei kounu maktabe inmwan sato lu karo be be nu meiri!

Tuilang tuipui tuilian bi takan nu meiri! Potpui phun takhemnu, saangtei muliaang nu meiri! Sumdungnu, ingou kenu, katang kenu meiri inza rai lan thei mak e.

Bani bangei pui bi laam nu meiri, laa takhem nu, bani zingpha laa pao zoknu meiri rai nwaam takka ung ngaak e.

Bazaaang bazaangga bani thou loi da rwe. Bani na takhwaang tonu talei la thou da rwe. Bani ung maknu ani talei zaang nge.

Ani talei bi khwaang laak lang mi mak hung rwe!

 Ani talei bi bengun semthei nu maak hung rwe!

 Ani talei bi tra kai theinu maak hung rwe!

Khwaang hing thang lang mi maak ka bakhai thang ungnu phaang lu sung sok mak bo?

Bani kut tuna khutsup ni bo? Bani saruk tuna khut lin ne bo?

Ani talei ani talei dan lan rwe.

Patso sui ung maknu ani laa riang rwe. Bani  sui maknu ani chong riang rwe.

Baze ye, bachong balaa dinu wa kung tak e. Baze ye bani chaang ani suitang ngam la ye!

Bani om tabou lung ding hung mu bi bani lung ung ding dan ne. Bani laa pao thou lat ting danne. Bani kahoi han ung ding danne. Bani bakiak thang ding danne.

Bani meiri rai lat ting danne.

Bakaan na mi khat chale ding le ngaak mak e. Ani le bakaan nung sui ga se ye.

Bakaan bazuk sia hung rwe!

Bakaan bazuk sia briak pina patso rwan na barak thei ga lung lang katip thang lat lat ung me. Ani lak pi thouna sanu babwa inza na le ani saruk lin ga chaat lang katswak ka thing kung louna thwei se ung me.

Patso ding kung zo! Babwa rwan ding kachui thang zo!

Naosen le man kale swak rwe.

Bani lang le patso meiri rai pui thang za wo. Patso laa le laam sung khut ka bachu thang za wo.

Ei zu ba patso meiri le thei lu mak, aom meiri le heiya rwe dinu le maak!

Kama ding za balungsia ung me.

Inmwan la bazi inn bi khwazin meitu khut lwai lwai bu-ann swangnu ding baning ngo. Ani talei daibazaangnu ding pithrai bu theng na kalei ngam mak e. Pupi ningting ding sianlan na kalei ngam mak e. Ani tuirui-thiraang bathiangnu kachaak-lupa na kalei ngam la ye. Nupa kariang ding ani misa na rin kazei la ye.

Louchwan tonu maanna baom baluptui man sa touga we dinu thei ye. Sangwan om loukra innta bi khatle pang bi saangkra lwak sip thang- amai le baan, kichaak le dun na basaang la bakhai sip! Hei pei rwe pumsa risa nu lan- rwanna kalei la dingnu lan! Sip sanu rithoi lousu rwe diga bachak e.

Lou zam le rimrim ung rwe. Lou ma ga louchun gon swak rwe. Thaam le raam tana rwe. Saangbu meithaang thangnu saangna riakbi annpek bwan thangnu ga sa za swak rwe. Louchun thaam mai bi kachaakrei le khan sia ga paan ungnu ding phaang luga kariang nge.

Sangwan na loi hung na bariak pina mang man theinu naosen le namla nu ram lana ba inn inmwan baloi hung na rwe. Ba nuh le ba pah na sasa-insa nu bacha thang rwe. Ui-aan khouring that taga krwaang sa hungnu ma baning thukka seba saga to thang nge. Baningsu wo nupa na talu taga na laang seba to thangnu ga balang be bani patso tabi na kut bahakna bu not thang lat nu to ding ngo.

Karo nu bapha swak bi a khan su nu amme dinu ba sangwan bi ngam hungnu khatle ningnu thung maknu dinu misa dou maknu mak e. Mi kasem na phang tam dom! Mi kasem na phang tom dom! Mi kasem na riangre dom, atiyeda heiya kut baza le kut chung dan, tasuk talat nu misa dou ga lung nge. Kani khat sa dom, kani khat sia dom lungnu misa chaang zung rwe.

Tuikwaangna ba lampui bi chat makka lwaang nge. Tuilian nu kaan am, tui riangnu kaan am!  Thingna le takaan pha bana chunnu ding basung sou mak e. Bakaanna khwalum pha phun hung lat damnu zwe dinu ding ngaak e.

Kwanpin basa na taram khat lana taram khatla zwaang thang, saangbaan bi lampui amnu dan ani talei bi zwang hung nge. Heiba basa na tuipui, ramwan, khatle bazwan zwang bachang nge. Ani talei bi thing kung-rwa kung khat le bakhwa sa ung nge be kama khatle ani kum zwaang hungnu dan hung latnu kaan bi le zwaang hung lat lune.

Atiga ani lang bahousa na para lian nu chat makka rin thang nge. Bahousa na ani lang bazaang ga ndao thang nge.

Sikpha khut na nule bacham ga zingpha le sei khit khit,  insi le baan khit khit, tha le nai khit khit, ani talei le sa khit khit!

Takaan ka ding bi ani kakhan zo- louna na bakaan thei ga chunnnu dan, kabunna bakaan thei ga tanu dan! Kadow tanu talei gale kathan thou lat ngamnu ngam phunne.  Louthwan na baan theiga baan swak nu heiya bakaan bachak thangnu Bapuba amme dinu baning su zo.

Thiraang kabei swakka ani talei kale hungbi- ani kum ningnu thung maknu am ngaak le karo thei nu sung phun luga loisin nu heiya kathan thou lat nu om chongren phunne dinu ani baning su zo.

Sangwan le loi hung tak na rwe.

Kwanpin le ani cham phun luga zwaang tasuk thou da rwe.

 

Hiakpu: Sachoiba Inkah

Chairman, Inpui (Kabui) Literary Society (ILS)