Inpui Rwanna Ngaak Ungnu Kalenu|Namsanang Riamroi

Image credit: Isaac Inkah

Ani talei bi kama am ngaknu khouring khouna khatle khusa khuba braan loi hung rwe. Kama tuikhun bingle kangta rwe khatle thingkung baron baronnu bing le mulan rwe. Kama kra ngaaknu thakra le tom ta rwe. Ani talei bi kasik kasa le kale hung rwe. Heibing nga “kalenu” khat e. Kani bathin cham teithak teithaknu ngaisu ongme heile kalenu we. Kasa nule swak tam thou rwe, ningtingnu le inku ka rwe, khatle lung sanu le inku thou rwe hei bing nga “kalenu” we. Kama swak kamaknu kasianu inza le kadou ungme, mu kamaknu inza le mu hong rwe, khatle kasianu thit le tam thou rwe, heiya le “kalenu” khat e. Heitiga kale ga ung lena aniya anin Inpui sarwan bingna aniya “kalenu” bathaang amrwe diga kani bathin kadou bathin briak bing bi rin ungme, tizo ha “kalenu” zo pa-aam bo? 

Misa lungning heiya khapthei kamaknu we- pen nu loi maknu we. Hagana kani bathin kale nwamme, dida ani sui tang ai, haga naye aniya ani mibingna “kalenu” ding bathai ongnu wa. Tizo pa-aam “kalenu” bo anina bathai nuzo? Aniya ani chaat Inpuina ngai ga ongnu, phaang ga ongnu khatle ngakka ongnu “kalenu” heiya, “change towards the goodness” (kasanu pek la kale suaknu) heiding nge. Bathwei taga kakhan zo kalenu bathaiye bi pa-aam to langbo? 

Kama ga kalenu mu nwaam me bi nang heiya kalenu taye, bapaan la ongthou lamnu rwan (who stay away from Inpui’s land) banina aniya Inpui talei bi swak ungnu kasa kasia bing ngaisu luga, muluga Inpui sarwan ding lung thei kamaknu minun, bacha thei kamaknu minun, kaiching thei kamaknu kaithangnu rwan (leaders), diga tam ga pen maknu indao hung nge, nang hung nge bi kale zanu ambo? Tidazo ningtingnu Inpui sarwan na talei bi sia ungnu nuwa nangna rwe. 

Nang kalenu manpa toluga aniya Inpui talei bi hung ngo. Nating Inpui talei bi na amnu, swaknu pot bing na nanu napa na riangre ga mina thei kamaknu mu kamaknu stage la pika tang thang rwe. Dida heirwan na ningting rwe diga Inpui talei bi ong kaat tarwe, tolop (salary) tomme ga Inpui talei bi chwan to kaat tarwe. Nangna nalian toga Inpui talei siaye ong kaat e, sian pitom me chwan phun kaat e thou lamda mak ga aniya Inpui talei sia ongba? B.A., M.A, M.Div., M.Th., 1^st class & ranking student toga thounu rwan za Inpui talei bi ambo zong phang ta-em mo nangle? Maak e! Tizo sia ga baze ding rwe? Kalenu maak ongnu ga bazenu mak ga?

“Where there is no leader the people perish”, sia ung ga nangna mak ga? Ningting lu rwan sarwan ding bachu thou lamnu ga nang mak ga? Dilu nasa pang da pang nge, lung siaye ong bazo tuding rinne ga nangna rwaan da? “Kalenu” ani bathai ye bi sian ding bathai maknu taye, riangre kaat maknu taye, outside la seluga Inpui taleibi swak ongnu cham theilu ga hati ga baze lan rwe, to thei lan rwe diga langkaang lana pao ongnu nun ga nang hungro tokale rizo nangzo takaat tothei makmak to ungnu rwan ding kiam se ungnu ga, nang rwe aniya Inpui chaat ding to basiat ungnu!

Achaat Inpui babwa rwan ga aniya ani kalenu mu nwaam me bi arweina kama ga kalezo? Kalenu dizo pa-aam bo? Zu-in ga ongnu nangna zu inlan nuga kalenuwe, chwan to takaat ungnu nangna ei takaatnu zala rwe kakhan thouwe bi haga kale nu we.  Tu indannu lungbet biang se ungnu nangna ei laan rwe to lat la rwe hung nge bi haga Inpui sarwan lang “kalenu” we. Leirik bachu takaat ga nanu napa sian bathaam bi choi braan ongnu nangna ei soi rwe hati latla rwe hung bani ga “kalenu” we. Na chwan nama don bapu thei mak ga poibraan ongnu nangna ei heiti ongnu zala rwe baning bani ga “kalenu” we. Kheisianu nangna ei kheisai larwe bani “kalenu” we. Antiamnu khatle kalaknu nasungna ei heiya amla rwe bani “kalenu” we. Kriangnu babwa rwan nang heibing nga tolang rwe diga kakhan rubo aniya? Hei rwe nangna ngak ungnu “kalenu”!

“Nangna to ngaknu chwan ga nangna to ting ting nge bi, nangna lousu lamnu ga amlat lat lune” tizo pa-aamto zoga? Chwan kathan towe bi nang loman kathan lousu lune. Lampui kathan se ye bi briak kathan bahtang lune. Lungning kathan kakhan no, ningting kathan lousu lune. Theisaak kathan sawo, pum kathan thou lune. Mik phaang kathan phaang ngo, pot kathan mulune. Thingkung kathan ling ngo, thakra kathan kralune. Kama khat zale to mak aangnu chwan ga towe bi, nangna khat zale lousu kamaknu kathan lousu lune.” Heiding rwe aniya kalenu diga nangna eina ngaak ongnu ga. Tizo kalezo dabe arwei kale lang bathaang am rwe. Atiyebi arweina kabia ungnu, ngai ungnu, ngak ungnu, khatle zong ungnu “kalenu” dinu ga Inpui talei bi am rwe.

Author: Namsanang Riamroi, Youth Secretary, INBCA

The article first appeared in Kala-Khwanbaang, an annual publication of Inpui Students' Union, Delhi (ISUD).