History of Karing Ngei| Kh.Adumba|Inpui Naga Karing Ngei 2018

Kama katakpi ani ding damthangnu Pa Jehovah Rikrwaang ding swankanu indao we. Atiluga heiba Karing Ngei bangui bi sinlaang ongnu kaichingpu bingding, ani Inpui Union om founder tonu, kaichingpu tonu bing ding khatle hung ongnu mibing za ding swankanu indao we. 

Karing Ngei, bangui ngei, bangui diba heiya ani khou barwannu bangei thoupui khat e. Heidannu om basopui, bapung phaza lang naosen patso bapum brum zana hung thang ongnu mibing ding swankanu indao we.

Atiga akhouna thoidokka kasanu choung tamga kabia la rwe. Dida rangkhangpa, ani Inpui rwan om mi sing tamga am rwe. Atinu nung suiga Inpui sa rwan bing lang Jehovah Rikrwaangna  rithoi pithangnu rithoi ga son damnu eina le rithoi ti’it cha pithang luga aom speech loisin lang tone.

Karing Ngei dinuba rangkhangpana thei ongnu rwe. Kama pupi rwan lang nga, thouchiak thoucha lungthou tanbina thouga misa thina maknu za mak e. nasana maknu za makka taleiram bi aisia zanu inza le swak e. Habing lang nga sangwan sangwan bi Tataaktonu chwan tothang ngaak e. Atiga aisia damnu bing lang ga seba tothang katinu bapumbrum ga kakham kataknu toga tataaknu diga tothang luga loisin thang nge.

Sangwan kathan hung lat khap dinu kaanbi ring ongnu mibingna karo ga Karing Ngei bangei lang rwe diga patso rwan –rirwannuna sothang luga atiga heiba bangei ya seta ong ngaak e. Atiga seta ongnu chwanna tato lang setanu bo? Haga bakaba amga setanu we. Karing Ngei, Bangui Ngei atinu chwanna bakaba amme. Aisia damnu bing gana atiga aisia thouda rwe atiyeda thoudamnu sangwan biga ani thinanu maak rwe. 

Ani nun ding Pu Rikrwaang (Jehovah) paan bina ani dwak swak rwe, thi lan rwe, Karingnu bing ga karo ga Rikrwaang ding swan ga, Hoba ding swan ga bangei lang zung nge diga patso rwan-rirwan nunna atiga so luga bangei  ongnu chwan ne. Atibriakpina aniya lumik ah ani ring ongnu  mi rwan om bangei rwe.

Ring ongnu nun bing ga nasana makka, pumsa ri saga lung lang pumkan rithoi diba kama kathiam rwan nunna inlaak inlaak pi pumkan rithoi thoi thang ga se ngaak e. Atiga lungsa domnu khatle lungchui domnu inkhun na mising khouring pithoi ye. Aan, ui katei katei phunswak kale ngaak e. 

Atiga haba khouring ga bathi taga luga Karing Ngei ya bangeinu nung suiga aniya bingna thouga nasana san rwe. Ring ongnu nun lak pina thilatnu diba am lat san rwe. Ring ongnu bing ding nga pumkan rithoi diga kathiam rwan, thampei, tako rwan nunna thoise ngaak e. Atinu om chwan ga ani Christian nunle custom om ga saye diga louluga saga seta ongnu we.

Atibriakpina inswan (Ka-amtha 12) Karing Ngei ya karingnu nun om bangei rwe. Pumkan katinu lumik rwe. Atibriakpina bakung tonu choungku, kung kataknu sungku khatle bamu tonu ani chaat bangei ye. Heiya rangkhangpana banim samak e.

Atiga eina rithoi choungkaang kasem kabiatanu kaan bi soimaannu inza amnu zaye. Habing gale kokthang ngo diga kamaga rinthang nwam me.

Eina choungkaan khat kani za rithoi thang de.

“Heiba Karing Ngei tampaangpwan kaika thangnu thwei bi lung ongnu ani rangkhang pa, aniya bingna heiba tampaang pwanna ani kraan ngam rwe. Ani thina lan rwe khatle ani dwak swak rwe diga kaikanu tampaangpwan thwei bi ongnu  ani rangkhangpa ani kraan ngam rwe. Atiga ani chwan tochui ga tolang bathaang amme. Khatle thounanu naosen rwan khatle babwa rwan nun bing le heiba bangei ya phangsu rwe diga ani rangkhangpa karo ingam lang rwe. 

Ani nun ririak sechuiga selang bathaang amme. Jehovah Rikrwaangna ani ding kriang ga pithi pina thang lan rwe. Ani ding kanthang rwe. Atibriakpina heipai bangeisu luga ani taleiram bi ong basaan ani khatle khat kriang kale ga lung lang tozo. Heiba bangei bina ani bahaapta lu lung thou lang to ingam rizo. Aniya bingna, intun intun hung ongnu khatle ba-in ba-in la khatle inmwan inmwan la ong damnu bingna le bahaaptaga heiba bangei bina ani nun Rikrwaang rithoi tamga lousunu toga lung ding ro diga akhouna rin swaknu rwe.

Atibriakpina ani Inpui rwan om khanglup (society) sung bi aniya heiba bangei bina thouga ningtingnu tam ga  khatle kasei kalian tamga chaswakka lungnu toding ro. Aniya bingna ani Inpui Naga sarwan bing karo aisa ga lungchwa ga lung inphin ga lungnu toding ro. Aniyana thouga Inpui sarwan bing khoule kapun karounu khatchale maakka lung ding ro. 

Lungsei bra inkwanga lungnu toding ro. Inpui sarwan bingza nasana san rwe khatle thina san rwe. Aniya bingna ani Inpui khanglup pi ongnu bing nga kamikama swak san rwe, Ani om Karing ngei bangei bina pumkan rithoi heiba rangkhangpana phangnu to ding ro."

Swanka rwe.

 Kh. Adumba was the first President of Inpui Naga Union (INU)
The speech was delivered during the first Inpui Karing Ngei, 2018, Haochong.