Barbers and Jesus: Transforming A Man

Image credit: barbershop-graz.at

Norman Vincent Peale na bacham chuinu baan khat Chicago bi hotel liannu khatbi Manager to ong ngaak e. Haba hotel bi kanikhat Norman ding Barber’s Convention bi choung kabia lang kou hung rwe. Hagei hungnu kaanbi samkachatnu rwna lakpina Madison Street la taluga zu kalo nu (drunkard) khat lampui paan bi in ongnu ding kadou rwe. Manpa pakhatna haba zukalonu manpa om photo lou luga bating tobathiangnu chwan tothang rwe. Basamle kachat thang rwe atiluga balaang pwansin-potnaat, necktie khatle kethop (shoe) bing kalei thangluga balaang sinsoi thang rwe. Baman pura tokalei taangbi hamanpa dingga photo kaap lat rwe. Atiluga haba Barber’s Convention bi haba zukalonu (drunkard) om photo ga Exhibit A diga thang rwe. Banina samkachatnu chwan sinnu to ngaak peida mikhat ting pikale swak ngam me dinu om bakaba ye. 

Haba Barber's Convention ga loiluga zukalonu manpa ding bathan sat lat tingbi barbers rwanna haman pa lang sian pithang rwe. Gus, Norman om baan manager gana kakhan ngaak e, heiba manpa dingga intun bathan sat ebe maan na kale taknu mi todingmu ? To bila bo? Maan na kama tonu chwan bi hangga tolat dingbo dinu balungning bi kakhansu ngaak e. Gus na haba manpa ding phaangluga kriangnu phao damme. Atibriakpina haba manpa dingga kadou luga rin damme, “Nangna na-om kum dingga pa-am bo khat pi gon/kale zalune, Ei nalaang chwan pithang ne atiyeda ating pi nung gai maknu chwan ba tomak o. Ei nating balumsaye.”

Haba zukalonu manpa na “ei na-om balumsat pibraan laye” diga katak tame. Gus na chwan zong thangnubi haba manpa ga nithum (3 days) chwan hungka tingting ngaak e. Atiyeda ni bali (4^th day) nu lumik piba haba manpa ga chwan hungka lan da rwe. Gus na Madison Street la taluga haba manpa ding tazongnu kaan bi lampui paan bi zu-in luna luga khabar (newspaper) phaluga in ongnu kadou rwe.

Gus na haba manpa dingga ba-om hotel la kalwang hungluga rin ngaak e. “Barber rwanna to ngam nuba bapaanla (outside) za bacha ngam me khatle tokale ngam me.” “Atiyeda abaan kasanu khat misung (inside) tokale ngamnu khat amme. Haga Jesu we. Nangna Bating nasungla pikhutluga barbers rwanna nating langkaangla tokale lang zanu pidamnu dan to we be nating le Jesu na tokale thang ngam lune.”

Atiga bakaan kasem Gus na haba manpa dingga suiphaang thang damme. Bachuzanu bachu thang damme khatle balungning pikale nu chwan to thang briakpina haba zukalonu manpa ga kalenu mikhat gonswak tame.

Moral: Man can change the outside, Only God can transform the inside.

This story is picked up from the book "Discovering the Power of Positive Thinking" by Norman Vincent Peale.