Tiding Ngo, Ei Akatha Na Zaye (It is Well With My Soul)

Image credit: GenealogyBank Blog

Horatio G.Spafford maan na Chicago bi kaphao nu lawyer khatle businessman khat e. Bamei Ana khatle basa inpaang le karo ga lung ong ngaak e. Atiyeda bani kumbi riangre nu khatle chunsia losia nu tam ga kadou dam me. Basa kapaisa khat pneumonia na nalu 1871 bi braan dam ngaak e. Haba kum ba om Chicago Fire bi business le braan ta ngaak e, ati ngaak le bakaan kasem hunglat nu kaan bi Rikrwang rithoi paan bina ba in business ka sinka lat ngaak e.

November 21, 1873, Samudru zahaaz (ship) Ville du Havre, French om lian nu hi Atlantic Tuipui (Ocean), USA bina Europe mi 313 le se ngaak rwe. Haba zahaaz piga Mr. Stafford om bamei khatle basa bali sui ngaak rwe. Spafford le sui se lang chamdaan nu we atiyeda ba in om business chwan katei am briak pina sui se makka bamei le basa rwan za se ngaak rwe. Maan na ni kasem inbi ongta lu Europe la nikhat nini bi se kati nu zahaaz khatlou luga Europe lana kadou kale rizo diga so ngaak rwe.

Ni bali Atlantic tuipui bi se ong nu kaanbi Ville du Harve zahaaz ka Scottish om Loch Earn zahaaz lian nu khat ting hungsu kale ngaak rwe. Atiga haba zahaaz pi twang ong nu binga kungtak nu phibam bi am ngaak rwe. Mrs. Spafford na basa bali ding kalwanglu zahaaz om balu chung katak la kalu Rikrwang kanthang ngo diga kalum ngaak rwe. Bakaan sei mak nu sung bi bani om zahaaz ka tuina thum liam ka rwe. Atilu Atlantic tuipui bi 226 mi thi thang ngaak rwe. Habei Stafford om basa kamaisa bali le sui ngaak rwe.

Sailor khatna haba zahaaz thumdam nu riak pi hunglu zahaaz om thinraak pi kamaisa khat sui bakhai se ong nu mu ngaak rwe. Haga Ana ngaak rwe. Maan na Ana ding kaithou ngaak rwe atilu zahaaz khatpi piphun se lat ngaak rwe. Ni kakwa nung la haba zahaaz ka Cardiff, Wales (UK) la phunthang ngaak rwe. Haba riak pina Ana na babasan khou chamthwan (message) bathan ngaak rwe ‘Arang tuza kan rwe, Ei into zu bo?”

Stafford na haba message frame tuga bacha lu ba om office pi bkhai thang ngaak rwe.

Pastor Weiss, bani zahaaz twang bacham nu manpa na Ana om lang bi atiga rinn ngaak e. “ Ana na rin ngaak e, Rikrwangna alaang asa kamaisa bal pithang nge atiyeda intunba maan na lou han lat tarwe Inswan heiba om baram ei soimakka thei lune diga kabia ngaak e”.

Mr. Stafford na zahaaz khat loulu bamei na ngaak ong nu riakla se ngaak rwe. Maan na bakhou riangre dam nu inza ding baning su luga heiba laa hiak thang nu we.

Daibazaang nu tui lwang nu dan lwang hung nge.

Sia nu tui kabaap ong biya.

Bachan bi pi am thang nge hei choung rin lang.

           

Ti ding ngo. Ei zaye.

Tiding ngo,  aluning na zaye.

Seitaan na bwei ga raihung nu am beida

Heiba kahan na ngaak thang ne.

Khrista na ason ding ka ouh thang amme.

Akathah lang Bathi tathang nge.

A noh langbi baningda karo tak e.

A noh ga pumbaang za lan rwe.

Pumbrum ga Jisu kross bi hemdan thang rwe.

Inpuh ding swan no he a kathah.

Krista paanbi ring, Khrista lang ei ring ne.

Jordan tui lianliam hung beida,

Ringle thi ngaak le ei riangre lat la rwe.

A laang daibazaang nu pilu zwe.

Inpuh Nang ta nu ding ani ong ngaak ne.

Thiram mak, tambaan ram ding zwe.

Chounglang nun trumpet le Inpuh braam ding zwe.

Heiya asung na lamphaang nu we.

If you have anything to share or want your literary work to be published, write to us at isaacnka@gmail.com

For more of Inpui history and culture visit a vlog in YouTube: IsaacNka & The Tribal Show.