Haochong Youth Club (HYC): An Initiative Towards Preserving Cultural Heritage

Haochong heiya Inpui chaat namlian katak nu khatle mi tam katak nu nampui ye. Mi katam na heiba nampui na chwanlian tuswak nu maktabe kale nu phun hung nu lamphaang nge. Intun intun Christian tuswak nu Inpui nam bing bi lakpi chaat om naat maktabe potchei kakung nu amtang katak nu khat e. Khatle inmwan balui ding maktabe kama om ramraak ting rakhe ga ong nu nam me. Haza mak e Inpui om thouliak ting intun intun tamga kaithou ga maktabe bachu (learn) ong nu khanglup khat e. Inmwan na tu ong nu chwan bing nga ani chaat lang tu nuwe.

Ani ririak kale swakluga ani om ririak om doctrine interpret to kabak nu tamga swak ngaak rwe haga na Inpui nam bing bi amnu ani potchei kakung nu inza baha bi asat nu, mei bati sat nu, man rwan lang bathaam pisaat lam nu maktabe inphum sat lam nu/inkam braan sat lam nu inza swak ta rwe. Haza mak ani inmwan bahak na tu basiat lamnu meiri inza am rwe.

Atiyeda ani thouliak na ani ding man pimu nu we khatle bakung toga ani om kheiliak khatle thouliak Rikrwang na damthang nu we, heiding ani pon basaang ka ding nu ani chaat khat om lian nu chwan don ne.

Inpui Karing Ngei 2018 bi Haochong (Pantong) bi lian ga bangei da rwe. Kasampu (speakers) pat 20 katei na thouliak om lang bi maktabe ani khanglup into sa thou lang bo maktabe into piring kalang bo di nu lang bi tamga rin da rwe. Ani talei anina bacha thou lang zwe di nu om message na ani om Karing Ngei bi bakung toga kasam dam me. Into ga ani om thouliak ding kaithou zubo maktabe piring kazu bo?

Heiba om katak (answer) khat Haochong (Pantong) Youth Club na choika ong nu khangtip (initiative) kasa nu khat amme. Banina katang ramraak maktabe inmwan lui/raan om lungkhon khatle inmwan om luitakrai (history) bi bakung to nu riak inza dingza kan nu tumak ka Inpui om potnaat khatle potchei ding kaithou nu chwan tamga seta ong me.

Haochong (Pantong) Youth Club le Haochong Students Organization (HSO) na ngaak thang ong nu maktabe phaang sin ong nu riak kasemzo: Katang ramraak, Ramahnu inkam riak, Bok inkam riak, Liamtwang kehiak, Inlu (Inmwan raan: kadairaik, karung riak, lanai inkhun lungsom), Lamuiba lungsom, Kapan (North &East), lungkalei, reiziawmwan, helipad, tuikhun (atiyeda tuikhun raan (old) kwan nu maktabe tu bathiangnu chwan tom dom rwe, heile tukok nu maktabe tu bathiang thang nu na sa lune).

Inpui Naga Union (INU) khatle Inpui Naga Women Union (INWU) bi Art & Culture Secretary amnuga dan Haochong Youth Club le Art & Culture secretary kathang thang lu ga kama om potchei kasem khom kadoi thang ong rwe. Heiya ani talei bi Museum maktabe Cultural Centre lian nu latswak mak saan Haochong Youth club om chwandon ding nga mibing na suikapon pham swak e.

Youth club om office bi almirah khat bacha thanglu ga habei potchei khom kadoi nu chwan tu thou ong rwe. Intun intun youth club office bi amnu potchei kasem zo:

Khwaang, kamaisa-kapaisa potnaat, meikalap thing, sung, kapho, indwan, sianmu, siantwei, darkang, anbreichem, katei katei.

Wood used for traditional fire making (Donated by Manichao Inka)

                                       Copyright of the images rests with the author only.

Heiya free will donation katam me. Hei dan nu chwan na nam nam bi ong nu youth club khatle students organization bingna brapka chuika lang bathaang tamga am me. Hei dan nu chwan na ani om thouliak ding kaithou lang nge. Atimak ebe ani cham za stage/platform bi kahan lu kasam kale zalu sia lang zung rwe. Government om bateng dingza ngaak ong bina ani chaat om thouliak braan tak luga sia lu rwe. Inmwan inmwan bi amnu om potchei potnaat bing ga kaithou nu chwan khatle kathan bacha nu chwan intunle inswan tamga tuthou rizo diga pa thang nwam me.

image credits; Isaac Inkah