Melancholic Tale: Of Love & Marriage|Poem

Image credit: Ballerina

Introduction

Kriang kale nu bing

Hungthung ne nu oithok mak e.

Hungthung mak nu bing ding

Kriang kale mak nu ye rin lang le mak e.

Kriang nu bi bing lung nge be,

Lung nu bing kriang nge be,

Talei kabei lam zwe.

Ong nai le kriang ngam mak nu

Ramwan raan-tuiraan la ong le kriang ngam mak nu.

Kriang takchuba ngaak thang dam zwe.

Kriangtakchuba khaang thang dam zwe.

Kriangrui ding sungchem na,

Tuilian meilian na tumut ngam mak e.

Sungbi inbwa ong nu rei,

Sung bi chok ongnu mei

Paan ong nu sung,

Chok ong nu sung zana thei nu zwe.

Kriang nu meiri bing reisam-laa tu pwak e be

Tu ngam la lang, rai ngam la lang am ngaak ne.

Talei zek, talei thot Dampuba kuthiam me.

Khaang ngam laga thou dam nu inza

Khaangthang-katswak lam nu inza zwe.

Intun kathi lampaak kriang nu lang paktang ne ongle

Balumsa loi mak o kriang nu,

Sungtak mak nu- talei thot phun nu sui nu zwe.

Village Tale

Eibe inmwan katang zwe.

Inmwan katang sek zwe.

Rwan na rin nu za ye maan be

Inmwan bi ong maak nu zwe,

Inmwan thou thei mak nu zung rwe.

Eibe inmwan sa zwe asung le athi bi.

Inmwan kapan takan swak mak nu balei

Pupi-nupa na kachui thang nu chong

Talip thang ong me aniya le.

“Namla nu ram sele minam mikai mak o.

Bangiam thei yo. Mikhat riangre thei yo.

Rikrwang ding bathan sat mak o,

Ningting barak theiga se yo”.

Inmwan bi ong mak ngaak le

Kriang nu hei rwe kutna kahin thang mak ngaak le

Hung dam zwe kabin nu thiraang ga.

Babwa kumsa thou bi

Ba in-balou zong thou we.

Baze nu zwe, bakaan badat na phun hung nu zwe.

Kama kheiliak ka intun inrut sat riak pi satsip thang da rwe.

Balung lung ngo, balung lung mak o rin mak e.

Tiyeda intun talei laam ding nupa na kachikhun ne.

Kapaisa na kamaisa kasa nu ding zong nu,

Kamaisa na inlou am nu, chwan chang nu ding zong nu

Thoudarwe haba zuk ka.

Thamlai apu ding meiri rai da

Rwa balem ga ga ati rin ne.

“Kriangba, nangle meikou za rwe.

Na baan rwan meisa am loi rwe.

Tu ding bathai bo akhou rinno.

Ei ba kabia thang ba rwe”.

 “Chong biak, laa biak sa nu

Seba nungba sa nu, chwan tuthei nu ding zong hung ngo.

Halu…. ga le thotle sa, chwan le sa” diga le rin ne.

Apu wo sa nu, sia nu ga bi thei lan rwe

Zong nu gabi ei zong hung nu rwe.

“Atiyeda athoiba man zwan ding bi lou hung mak o no”.

Diga kabialu heiba laa tut tuka ye.

“Man zwan ding lou mak o, Chongbiak le tei,

Sung le tei, man zwan lou mak o.

Niram sa ding lou wo”.

Inmwan bi anu baan rwan,

Mithei rwan le nulwei ding kadou bi

“Haba, namnai kumeini ding loune be lou wo

Atiyeda rwan chaat ding lou mak o”.

Ei baning sunsun lu katak lang thei mak,

Suizong pui thang ro, thou katak thang da

“Eeeh, nani lang pai anina zong nge bo

Phang dam zwe satak nu phang dam zwe

Sungtam mak o” di ye.

Nu lwei choung ding hwei ye

Rinthou bi lan ro ating bi

Nurwan ga halu kachaak kapum kaipiyo diye.

Nupa pang intia lian bo ngai ong me.

Brakthei ga ongle na lan inza ambo ngai ong me.

Mang ba tha (moon) ka nu mang zwe,

Lungning  le America rwan zung rwe.

Karam lu lung nu talei zek lan rwe.

Phun lan rwe potrit kasing kale ne nu lungning.

Hung nu rubo kekho baze zalu lung lang?

Hei rwe tazwan lungchui nu tiba zo?

Hei rwe intun kaan nupa bachu kamak sa rwan.

Hei rwe intun kaan sanao bachu kamak nu nupa rwan.

Rwan chaang za theilu, bachaang thei lan sa rwe.

Hei sungriangre nu pao kalalwaang lang le thei mak e.

American Dreams

Intun be rinlang hak na kung nge.

Intun be railang hak na kazak e.

Sianle kriang nu, kachaak in zong nu

Zuk hungtang rwe.

Katang rangaak kachi kazak mak nu

Kaan zo hungtang ong sa rwe.

Apu na rinne

“Talei zuk kale da inwan bi

Louchwan tulang mi maak rwe.

Lou riak le thei lan rwe, Lou chwan tonuba thei la rwe”.

Anu nale basung riang re ga rinne

“Bahei basing baloi thouda inmwan bi naosen maak rwe.

Rwan ramla zon thou loi da rwe.

Naosen sui mak nu inmwan barim sia ye.

Mei kouhung le into, Kou hung mak le into?

Kouhung le inmwan chwan-louchwan tuthei nu ommak,

Kouhung le inmwan bi ong nu ommak”.

Siantui intaan nu mengbi Noney la thou da rwe.

Thouloi darwe Batei la bahei basing meng bi.

Nupa rithoi louthei mak ka thou da rwe.

Karo basaan rwan ram la

Thirwei thiraang nang rwe be in zon hung.

Inmwan bi ong kaat numu

Banu bapa-bapu bani seba bi murou nu mu

Talei zana na thei lang rwe.

Khang chong sok amle theithang bi lan rwe.

Bakaamnu chong kabia bai hung rwe.

Bakong akong za sat nu kaan hung rwe.

(A poetic verse  deeply influenced by folk song critiquing modern family values)

The first collection of poems by the same author was published in 2017 titled "Thabaan Sanu Zingpha, In Search of an Audience".