Determination and Perseverance: John Augustus Roebling

(A real story of engineer John Roebling who build the Broiklyn Bridge in New York, USA in 1870. The bridge was completed in 1883 after 13 years)

Roebling (Source: Wikipedia)

(A real story of engineer John Roebling who build the Broiklyn Bridge in New York, USA in 1870. The bridge was completed in 1883 after 13 years)

Kama ningting nu engineer khat talei bi bacha mak aangnu khatle tei laklak nu kalei (bridge) New York le Long Island ra takan lang kakhan ngaak e. Atiyeda haga bainu chwan mak ngaak e. 19th century bi tuiqwang liannu ding kaleina ra takan lang dinuwa kungtak nu khatle oithok lanu chwandon ngaak e. Atiyeda heiba engineer na baom phaap (idea) ding nga kanikhat mak tabe kanikhat soimak ka bacha ne dinu lungning lian ngaak e. Haba engineer meng John Roebling diga kou we. New York le Long Island lakpi kalei bacha ne diga maan babaan rwan engineer khatle administrator rwan katei khou kathui nu kaan bi mi khatchana le bating nga balum samak e khatle mikhat chana le suikabapon thang mak tamme. Babaan rwan kathei nu rwan le heiba chwan na oilaye diga tam ga rin ngaak e atiyeda Roebling na basung bi ngam khap e dinu lungning siat siat nu am ngaak e. Heiba chwan na mi khatchana le tu mak aang nu khatle kakhan swak mak aangnu ye.

Roebling na heiba chwan na choika maknu zala ye diga ba lungning bi chat makka kakhan ngaak

e. Mi katamna ba om ningpui ding thougoi thang maknu kaan bi maan na sungtam nu makta rounu le inza kadou damme. Atingaak le hading maan na ngamlu ga kanikhat basa Washington khou ba lungning bi amnu ningpui (vision) raithang ngaak e atiluga bating nga heiba project choika ngam khap e digaconvince tu ngaak e. Atiga bapa le basa heiba idea ya into bacha swak ngam khap po diga thuk ka kakhan ngaak e.

Barwei khou amnu idea khatle potchei (resources) na into ga heiba chwan choika langbo khat le tuloi khappo dinu kakhan ngaak e atilu barwei na riangre nu khatle kungnu inza dou katinu ding into ga ngam zubo atiga tamga kathui ngaak e.

Bakaan kasem hungnu kaan bi barwei om kalei draft loi rwe. Barwei na chwan to lang mi nek thou rwe khatle kalei ya bacha thou ngaak rwe. Thoutan bi chwan don na saga seta thou ngaak rwe, progress le satak thou ngaak e. Atiyeda tha kasem chwan tu thou nu kaan bi kalei bacha ongbi accident khat swak luga Roebling nga sok basiat ngaak rwe. Maanna balu kathwak sok ngaak rwe. Heiba accident bina maan na choung kabia thei lan darwe khatle se thei lan darwe. Atinu chamma mi katam na theiswak nu kaan bi rin rai nwam nu baan rwan khatle katei katei na “ Kama ani rin ding rwe, oilaye diga” dinu rin bata nu choung tamga kabia hung lat rwe. Mi khat chanale kachui thang nu maktabe sasa nu choung, katun thng nu sui mak ngaak rwe. Mikhat lungning pisin nu choung karwak kabia thang ngaak e. Roebling na batikmaaknu mi ru briak pina heiba kalei om project ka sia daro balangba mi kateina le choi ka ngam laye diga suggestion tamga le pithang damme.

Roebling na handicap tu ngaak le basa Washington le barwei ba khatchale lungning son mak ngaak e. Washington na bapa na badan ongnu ga hung thung ngam lang karam damme. Maan na mi katei dingle inspired tuluga bachwan bi suito lang taswan khat ka ow damme. Roebling na hospital ria bi inga ongbi louthwan nisat baan khut nu maaktabe thiraang kabin nu window bina raang khut nu kaan bi maan na kakhan damme. Heiba khudam rwan na ating katun thang ongnu we khatle alaang lungning kathan pithang ongnu we diga lungning lian damme. Atiga ongbi maan na baningsu damme hazo, ba kutzung khatcha kaling ngam ongnu heiding nga choilu ba om project ka loisinne diga kakhan damme. Haba kutzung dingza trained tu ngaak e atilu bamei le barwei haba kutzung na communication tuthou ngaak rwe.

 

Bakhwasei maknu lak pi bakut zung khatchana communication tuthei thou rwe. Maan na baom engineer rwan ding han ga kou kadoi lat lang rin dam me. Atiga bakut zung za choilu ba om engineer nun khou chwan to katinu gong khatle ba om idea ga hanga rin thang lat tamme.

Sangwan 13 khaak engineer khou rin nwam bing ga bamei khou ba kutzung na tap tuluga rin damme. Sangwan 13 loihung bi Brooklyn bridge ka loihung ngaak rwe.

Heiba meiri na rinnuba ani om ningpui liannu taye. Ani ningpui lian luga rwan rin batanu maktabe bala ga ong ngaak le badan ongnu chwan ga soimak ka loi hungne dinu lungning liannu taye.