Ri Mei Tunu (Inpui Folktale)

This Inpui folktale is taken from “The Origin of Inpui Naga Tribe and Their Culture” (2010) by K.Andrew Bariampaan. Pp 106-109. 

Image for representational purpose only. Credit:The public domain review

Kama misa lung thou tan bizo ri khatna bamei lang misa ding lou luga lung ong ngaak e. haba manu ga Bariampaan rwan zwan ngaak e khatle bameng kadilu diga kou we. Atiluga ri mei tu briak pina haba mannu gana nainba ri inn ding ta-eng tarui turwe atibriakpina aniya bing na thouga thi san rwe no diga kanoi thang sia ngaak rwe. Hagei bingna thouga ba in ga thimak ka lung thou ngaak rwe. Atinu kaan bi bani lung bachm ong ngaaknu Khumba rwanpa khatle Inka rwanpa in inkhun na mithi luga chap ongnu ding phaang basat luga Bariampaan rwan pa inzo na barangou (basa) nam hung luga kathi pum katha tuga riabi pwanna kazwan luga chaapka hwei thou rwe. Atinu kaan bi kathi hwei chap ongnu bram ga tambaan la thei kanu kaan bi haba tazwan nuga na ba basan khou a-in lamang mithi mina sane diga kanoi thang damnu zungda chap ongme. Ei in lamang ta maang nge diga bathem nu kaan bi ba basan zona thina sane diga kanoi thang dam zungda khat chale ngaak laye nang taza laye diga rinnu kaan bi haba mannu gana bathem lai lai ga ati dabe taro atiyeda misa theisaak sui saza laye diga kanoi thang luga tambaan kalaak khotung taluga talei lamang ba inn bi tarwe. Ba –inbi tanu kaan bi ba mi rwan nunna karo ga zu in kasanu lei kadou thang nu kaan bi maan na ei inza laye diga rin rwe atinu kaan bi atidabe rina mumak tam lang pwan lat siari khat kariat khat dia alusip pi laam thang ngo diga rinnu kaan bi haba pwan ga sap thang rwe. Atiga zu ga inlang tu ong khap rina basaang lamang na bachim tarwe atiga haba pwan lat siari khat kariat khatja bachim kabaan phit taluga ngaiduk pi bachim tarwe atinu kaan bi achiana ei atilune dirwa da diga kabia ong basaan na ri kalaak kale lou ka lat tam ngaak rwe.

Ri na bamei khou kanoi thangnu bameina zeingam mak briak pina kalaak kaika dam briakpina haba tazwan nu ga tambaan kalat su lan ruga hageina Konthoujam diga kounu ta ram bi chingtum khatpi lung se darwe. Atinu kaan bi haba tazwan nu gana basa Khuriphaba diga kounu ding tambaan la asat thang basia dam briakpina basa ga banu maak bariak pina chap laiga bapaba riangrei diga kounu louna lou luga bathem rwe. Atiyeda zamak pei pei briak ina ri zona talei la phekta ngaak rwe. Haba taangbi bapa na paachum lou lat luga basa ding bathem latnu kaan bi basa ga chap lan dam ngaak rwe. Atiga bapa basa lung sei thounu kaan bi basa ga rwan in lamang taleng senu kaan bi babaan rwan na banu bapa bapu thei kamaknu sa diga pang kabia kabia bida maan na bapa khou hung luga ngai lat lat nu kaan bi bapa ga rinswak maknu ngam makka raithang rwe. Atinu kaanbi habei zona basa banu kimla suita lung dam rwe diga banu kimla talei lamang suita lung dam ngaak rwe. Habei atibina Konthoujam taram bi bari nat nu tamnu we diga diye. Atiga atun tang ga haba riakpi khunaangkung barwan nu kani thou ongnu riak pi ga haba thingkung se takan luga Inka rwan pa khatle Khumba rwan pa na laa pao nu kaan bi harwan ga thi khap khap ka ong ngaak e diye. Atiyeda Bariam rwan pa dingba khatchale ken mak ngaak e.