A Glass of Milk|Inpui (Kabui)

 

Image credit: Public Domain Pictures

Kanikhat lungsia nu manpa inmwan khat pi inlak inlak bi pot zwan se ong ngaak e. Maan na katang tuga baom ning-in  kalang maktabe baheibasing intan bi (school/education) fees pilang  sian intaan se ong ngaak e. Habani maan na nisat nat nu thwei bi riangre ga pot zwan se ngaak rwe. Thamlai nisat nat ru briak pina maan na buchaam rwe. 

Ba om siankhao bi sian phaangnu kaan bi sian na tomtak ngaak rwe. Bakhou amnu sian gana balang sakhap mak ting ngaak rwe. Atibiriak pina maan na in khat pi khut luga  thaisak nilang rwe baning ngaak rwe. Maan inkhatpi khut khap nu kaan bi katampi khat inkhaan bi swak kadou rwe. 

Maan na patso ding kadou briak pina buchaam chaam taraan ngaakle nila rwe diga kakhan  ngaak e. Ha katampi nang “Asa pa wo nang pa am bathai bo”?ngai rwe. Haba manpa na “Ei tui taraan ne, tui ngai khatcha pi in thang za khap po?” diga ni ngaak rwe.

Atiyeda haba katampi na katangpa riangre nu thot phaang mu ngaak rwe. Atibriak pina maan na tui ngai pinu sarukpi sen kanutui lei swak thang ngaak rwe.

Katangpa ga karo nu phao damme. Ngai ga intaang bi sian inza ta rubo ngai damme. Katam pi gana katak e, “Nang alaang khat chale pilang maak e, ei baman lang pinu maak e. Kama anu na mikhat riangre baputhei galung lang bachu thang nge” diga katak tam me.Haba katang pa na katampi ding swanka nu choung kabia thang lu seswak lat rwe.  Maan na se swak latnu kaan bi bapum ma zaang nu maktabe nat zou-zou nu lousu damme.

Sangwan kasem nungla haba katampi ga na ngaak rwe. Banat ka rit tak khut ngaak e. Inmwan bi ongnu louputhiam (doctor) nunna balei na paam leina bo thei ngam mak ngak rwe. Nampui lousang (hospital) lian nu riak la phun sero diga rin thang ngaak rwe.

Atiga nampui lousang sanu khatle lian nu khat pi ba phun thang rwe. Haba lousang biga kama potzwan senu katang pa louputhiam toga chwan to ong ngaak e. Kanikhat nurse nu na maan na potzwan thang ngaak nu nam bi na katampi khat phun hung ong me diga louputhiam pa khou rinthang ngaak e. 

Maan na louputhiam  ria thang ongnu riak la pak swak lu na ongnu katampi zo tubo diga swak phaang ngaak rwe.  Louputhiam pana lousang ria bi khut khap nu kaan bi kama bating taraan pipem damnu katampi ding khut mu ngaak rwe. Maan na ngam nu bing haba katampi ding seba bina maktabe balou batui pichui ga pisa pi in ngaak e. 

Bating rakhe choi tak thang damme. Bakaan tamga hospital bi ong ngaak e atiyeda kakham bi haba katampi ga sa swak rwe. Atiluga lousang bina discharge tuza rwe diga louputhiam rwan na rinthang rwe.

Lousang bina discharge dingnu meithaan bi laina phaangnu bill ga phun swak rwe. Haba katampi na bakaaan seiga hospital bi ong briak pina ba om bill pi ngam bi larwe diga sungtam ngaak e. Atiga maan basung riangre ga haba bill ga lat swakrwe. 

Ba om bill ga sian taswang khak ta ong ngaak rwe. Atiyeda kathwei laa phaangta da doctor heiba choung kaang hiakthang nu dou dam me.

“Na om se knutui ngai khat kana na om lousang om man (bill) bing thun loi rwe”.

Hiakpuba

Dr. Howard Kelly