Sikpha Meiri|Inpui (Kabui) (Winter Memories-Male version # Dancing Monologue)

Image credit: Adamsabroad

Losia zanu khatle kriangtak zanu chuihiak e. Atiyeda kama pupi kaan om meiri mak e.

(For best result, read only during winter season)

Kama Kaan

Kama kaan meiri saye,

Thingna le ba-an chuiye.

Lumikle bakhwa theiye,

Thale insile baan chui ye.

Naosen, patso

 Takhwang le kalum me.

Lousam le mong chui ye,

Khouring le ra-uh ye.

 Karo nule hen ne,

Mibing kadoi saye.

Na sana nu baat e,

Kathiam ket zaang nge.

Riangre sungtam nu tom me,

Sa-in lang baat mak e.

Lungzo nu kaan, karo nu kaan;

Kama kaan kani khat chale hung lat o,

Meiri sa sa phun lu.

Kakhan ne lungning bi

Kriangnu ding hwei nu dan

Hung lat o kaan sanu nikhat-nini zale.

Naosen le tam, saangle tei,

Ankwat ancham le saye,

Indop tuikhun tuile thum me.

Khatkhat riangre manthei kale nu kaan.

Kama kaan, meithaan kaan saye.

Mibing na naosen toga lung thou we. Mibing naosen thot phunthou we. Kama meithaan kaan meiri mibing om lungning bi ri thangnu mak tabe baningsu nu inza amme. Heiba chuihiak na kama kaan kaansanu kaan ding hweiga khatle banim tala ga hiak thangnu we. Na om meiri tei ngaak ne atiyeda bakhwa khatle bapha maktabe tosia ga inmwan bi liamtwang tose nu heiya bakaba zo maak nu atiyeda ani lang pemtak ngaaknu chwan khat ngaak e.

Sikpha tarwe bi nupa louchwan kakam loi hungnu kaan ne. Inmwan bi khumpui khumbeng braam bachaat bachaat braam nu kaan ne. Basa (kwanpin dannu) inza le ani inmwan bi zwang thang ga kasanu riak zon hung nge. Haba kaan bi rwe naosen rwan le school suti phanglu inmwan bi chwan don tomnu kaan rwe. Inmwan bi school kanu katam me atilu langkaang la kasenu rwan le in hungnu kaan rwe. Samga rinne be “karo liannu kaan, bangei pui kaan” zo heiding rwe.

Gari Bake Bali: Bake bali gari twang ga inmwan zaibi twang se nu na kapaisa rwan kadai khat to ngaak e. Khongkrao khatle chapel maktabe khonggup twangre ga nupa na twei batwan  ong ngaak e. Inbina zupi, water pipe khatle zanthao inkam ga louswakluga ong ngaak e. Kekhok twang kalainu maktabe sokliam nule inza swak ngaak e.

Siantui Intaan Nu: Heiba kaan bi naosen peida siantui intaan bachu thouwe. Kamang nilai la chemthaang khaatlu langkwa chounu, thakra, kama, kongkra kareknu, tangong kalainu katei katei tamga tu we atilu bazaar la zwan seye. Haba sian gana bangei (Xmas & New year) om potnaat maktabe khorsa tuwe. Kamaisa rwan nale louda chou senu heipai tuwe.

Hazamak e sikpha kaan thingla thangnu kaan bi. Takaan ka briakpina thingthi laa kadoi thang ga khaoraak pina maktabe thingtwan tuga innbi phun hung nge. Hazamak ka thingring la lu thingkhon tuga le thang nge

Sa In Kadoi Nu: Takaan bi kranu thakra tamga amme. Kumla, nobaab, champra, tokra, taru kra khatle thakra thunnu katei katei tamga kraye. Heiba kra ya inn bi sa kadoi ye. Banai salu meiri rai nu heiya ani thou danga tuwe. Kruka kadeng sanu kaan le rwe.

Picnic: Heiba kaanbi inmwan babwarwan,naosen rwan katei katei picnic se kalye. Ra-ahh tuikwangbi maktabe ramwan briaksanu riak pi selu laa tuga khatle khouring that taga sa seye.

Laa Bachunu: Bangei liannu hungding briakpina inmwan bi khanglup bing na laa bachu we. Sunday school bi ka balei rupkathan la hunglu Christmas le New Year lang laa khatle skit khatle drama katei katei bachu we. Sikpha zingpha ngaak le karo tak ka sui se ngaak e.

Innbi Christmas Laa Bathan Ongnu: Heiba kaan bi radio zana khop mak e.Innai ngaisu lang laa karek rakan kale nu danne. English laa bina, batei laa khatle Inpui laa tamga bathan kale. Harvest Team om Christmas cassette khatle English BoneyM, Jim Reees, Michael Learns to Rock (not gospel), Kenny Rogers tamga ngai kaleye.

Christmas Keithian Kasenu: Christmas keithian kasenu, maktabe suise suinu heiya sangwan khat om bana (award) tan nuwe. Suse sumak le potnaat kathan louhung dingnu ding ngaak ngamla ga ong ngaak e. Zingpha inthi talaga ong ngaak e. Kalei hungnu potnaat ga bachu sale siale, cha le chamak le karo karo sizing ngaak e.

Sekai Senu/Khouring Zongnu: Manpa patso rwan na bangei bi that salang sentaak, sen, tom, seloi maktabe bok, ui, ken katei katei inmwan bi zong se ye. Inmwan bi maak e be namkhat la bangai lu bakai hung nge. Haba khouring ga katang swan rwanna sian ga ong nge. Hazamak kamang nilai selu sekoi (hunting) se ye atiluga tuikwang lale nga banam senu amme.

Bangei bi thaktanu khouring om bladder thiraang semthanglu inmai bi kadainu heiya hoidou ngaak e. Hazamak tuikhun la sen karin/bok karin tuse nu le kapaisa swan om bathou ngaak e.

Visit From Relatives: Innai taleng kale nu maktabe bu an sa karung nu dat pi namla la ongdam nu inkhun maktabe tazwan rwan na ba in ba in baloi hungnu dat e. Heidannu kaan bi chun sia losia nu maktabe karo losa nu meiri rai kaleye. Mikathan kadou nu kaan le rwe. Namla lanu hung kadoilu bangei bachamnu heiya inkhun za ding pikaro nu tomak e atiyeda khanglup ting pikaro nu kaan ne.

Christmas Bangei Riak Bachanu: Christmas maktabe bangian riak bachanu heiya sungkazon ga intun intun le bacha kale ye. Heiya khanglup pi sungcham laacham nu phun hungnu kaanne. Manthei kale maknu le man thei kaleye. Hazamak khat khat zakale maknuamle heidan nu bapham bina nung ngai maknu bing ga dwak sat e. Camp thingbom, kithang kung pai bapon nu karo tak ngaak e. Chena taan kalu thiraang kabin thangnu le phaang sa tak e. Hazamak mike/loudspeaker thang kalu laa bathan nu maktabe patso na choungpao ongnu hakna kriangtak nuwe. Khwazin inmwanzai bi rupkathan kang laak nu heiya mi lungning bi losianu le karo nu inza swak e.

Christmas kadou (24 December) khwazin bangei riak latswaknu kalum louka ongbi mi man kathan maktabe mumak seinu unao rwan dingnu mu nu kaan bi karonu na sip e.

Bukou Sanu: Bangei nit pi innai zamak ka man khatle unao rwan, mithei rwan hungnu ding bukou salu Ri kalum bacham nu heile sanu chwan khat e. Asa mak le hung kadoilu karo kadoi nu dansanu maak rwe.

Meikou Kalaaknu: Takaan kabi mei kathanu khatle tazwan kalwang sanu le inza tuwe. Heiya inmwan kalung sa komnu phaanglu bakaan ret thangnu we. Inmwan bi bathou bamung tamnu kaanne.

Nu Louchun Senu: Nuna lou kra katam kakam hung ngaakle maan lou tang maknu maktabe mintak maknu maktabe chwan hoikham thang siadamnu ding louchun la selu baphaang lat e. Kichaak thingnu, ankhiang laak nu, be laak nu, neem khatle cleem laaknu, baanra, baan lwaknu, banphinkra rainu harwan na nu na setu lat e.

Loubaatnu: Inmwan kasem na kumthang louhan katinu riak rai thang karang nge. Inlaak kasem ba lou aat loinu seimak ka louzong selu loubaat thou lat e atiydea inlaak katamna in bi ong basak luga bangei dat ting ngaak ka ong nge.