Kazingnu Bi Karonu|Inpui (Kabui) Poem

                    Image credit: Cherry Laithang

Ei, ei,

Nang, nang

Nani, ani

Alaang za, anin lang za

Aphum za, achaatza.

Braam ungnu khwanga kathikhwangbaang male natting nge.

 

Kathing-aitunu na ani maadon,

Liantu nuna batru lu thong ma basaang,

Lungning sinnu mikphaapna tapon tuluga

Ani satpe intia sabo di inmwan kasong ungme.

 

Naom inmai bi na inchan?

Naom inmwan kapan bina inchan?

Barit maaknu tampaang ding phaang luga

Bazenu zo hei rwe ungme.

 

Bazenu mangga be batakki khat bi takulu kazak chapnu

Nangbe ngaisu la ye.

Nangna sa rwe di bacha kanu risang ga

Sangwan lumik ta mak balei bao lam lune.

 

Nakhou rin thang mak bo?

Na choung liannu ga

Naom indwan khouring hakna ngaina ye.

Nalu bi kalaaman luthop run ung da

Na inhnai na,

‘Ha-inh ding be banai mak o’ rinne.

 

Nake thopka lou swakluga

Louthwan kado ta ungnu lousambi

Nake basai se ta-aanno.

Namun bi run thang ungnu pwan ga lwak swakluga 

Naman ga katha-an bi phaang ta-aanno.

 

Kaling lakpi reipwan paan ne diga karo ungnu bo?

Reipwan paan gabe kamaang sanu riakla paanne.

Meng sanu ga pwanraan zana run thanglu

Karo karo naathan busun sutsa bacham katinu baan kaniga

Tuina tuite han luga bameng bameng kasang ungme.

 

Phaanglo!

Kazingnu bi khwaang laak ungda

Khang laam lang thei mak ungme.

 

Isaac Nka

He regularly blogs at Antrimwanbut Khwa www.isaacnka.blogspot.com