Tamsaipwak|Poem|Inpui (Kabui)

Image credit:Luther Inkah

Khwalum-tahwan nisat lakpi khwasun tru-ru lumik baan kaphu thangga,

Namlaa nu Antrimwan le saangbaan lakpi tampaang pwan dan, khatle kachaak kapan dan han
Kamaang sanu thingkung-rwakung lakpi changthainu bachu siari na prei rui dan, 
Damnu lak pina phaangsa katak eh he “Tamsaipwak” .

Changthai damnu Rithiam, misa munthiam na khat chale rin tang ngam laye’ 
Kasennu, komlabachu, bazinnu, ba-annu, kadumnu, hikok, meithinreibachu, 
Nakhou na daibazaangnu, kriangnu, karonu, bazenu, sungkazonnu, suikabaponnu, shungkatip
Gun kasanu, langdaan kaliannu lousu ye  he “Tamsaipwak”.

Rin bachak lang maaknu Rikrwang om kuthiam, bazei tang lanu theilamzek kasanu lousu ye,

Kasennu zuksin bi tathiram, ngam, Pangkan, shungdik, shungchun, kriangnu chun pithang nge,
Komlabachu na shungbwanu, karonu, ningtonu, pi-phaang bathainu,bachunnu amme;
Lungning pilum thang, khaangtheinu pi thang nge, he “ Tamsaipwak”.

Bazinu bachuna misa lungning pikathan thang, pi bathiang thang, khatle chukdao ye, 

Kabaannu, takhwangtalunu, raangnu, thouna pithang nge. 
Ba-annu na lungning pikathan thang, daibazaangnu, shungkazonnu, singlou pi thang nge
Nating batou phaang nge, nangbi louthwan insi than ne he “Tamsaipwak”.

Kadumnu na thuk tamnu samudru dan misa shung ding rin bachak thang nge,

Baklan maaknu sangbaan basaangnu dan ani badan le basaang ka oh, 
Khatle ningting, bazenu, ningam, balumsa kak-kaknu, bahaaptanu pithang nge. 
Hikok bachu na misa lungning thukka pi kakhan ngamnu saruk pithang nge.
Kabaan tang laye, talei misa na, lungning bi kakhannu na makka he  “Tamsaipwak”. 

Meithinreibachu om zuksin bi, lungning katha pikalwan thou thangnu 

Khat le kanung om ningpui, mang, misa kumbi kabaannu, kasanu pithangnu,
Talei mina kabaan tang lanu rigun, talim, shungdik pi thang nge.
Tamsaipwak om kasanu gun daibazaangnu, kriangnu, karonu, bazenu, sungkazonnu, suikabaponnu, Shungkatip, talei misa bing za khou amnu to ding ngo!
Rin kapwa lang maaknu gun kasanu talei mina tamga lousu ye  he “ Tamsaipwak”.

About the author: 

Nk. Greenson Kaiphun-ga is currently the pastor of Inpui Christian Fellowship, Delhi (ICFD). He has also written a book titled "Inpui Naga Folktales: Thouchiak Thoucha Kama Pupi Meiri" 2013. He writes on the theme ranging from family issues, nature, and tragedy. He has written drama/plays, poem and articles on the aforementioned themes.

He can be contacted at greensoninka@yahoo.com. 

NB: This is another fine writing in Inpui on nature worth reading. If you have such writings looking for a space to share with the wider audience. Kindly send your writings to isaacnka@gmail.com (both English and Inpui).