Sangwan Sumthum Taang Bi|A Story

Image credit: vactualpapers.com

Moscow Namlian bi sangwan 12 zanu kapaisa kani bacham chuitakka bacham ongnu naosen kani am ngak eh. Andrew na Moscow rwan ne khatna na New Zealand rwan ne bameng na John kou ye. Andrew na lungsanu saye, John ba lungsiaye. Barwei patni unao pon bacham bahaknu male kriangga bacham chuinu baan kaniye. John inn Moscow namlian bi bakaan kasem lung thang luga inkhun om phibam na chamakka nupa lung thangnu talei la han maknu zamakka selat tam ding rwe. Kriang kale takka bacham ongnu baan kani se kapaang kale dam ding briak pina kani khat barwei patni choungren torwe. Baan no phibam chamakka anya arwei se kapaang ngaak peida sangwan 30 taang bi soimakka kadou kale lat cho (thaa-lumik Karen thang luga) zingphaa pung 10, Hotel Maroseyka, Moscow bi  kadou kale lang choungren tothang rwe. Hong kadou latnu kaan bi arwei kum bi swak tamnu karo-losiat meiri hong rai bacham zo diga karen thang rwe. 

Sangwan 30 ga thou darwe. Sangwan 30 taang bi kadou kale lang choungren tothang damnu bakaan ga hong rwe. Sikphaa dainu kabun tanu bakaan ne. Andrew le John na kadou kale dingnu lumik niga khwasun ru-ru tambu zingkhim khim dainu bakaan ngak eh. 

John: Ash-anya Khwasun ru-ru thiraang le kabin sin-sin bada daitak eh. Meithaan heidan ga dai maknu dan zong da, ani leng daitak eh. Moscow bi hong maknu le seiru bada kabei loidam sia rwe. Abaan pale arwei na kadou kale lang kabia thang damnu Maroseyka Hotel ga hei dan zong da. Hei maknu zong mo? Ha kom bi babaan pa ding ngaakka ong rwe.

Eh! Ula hongna baga abaan pa dan rwe, Maan ngaak rwe. (Sangwan 30 nungla patni rwei manle kale loi rwe.) 

John: Hay! Nang Andrew makka bo? 

Andrew: Ngak sak-sakka! Oh Ei Andrew rwe. Nang na tu bo?  

John: Ei nabaan pa John ga rwe. 
(Kaput kale rwe)

Andrew: Oh! Nangba man teirat tarwe hay! Baan no saga ong am bo? 

John: Oh saga ong amme tilang ngak rwa da!  

Andrew: Oh arwei na kadou kale lang choungren tothang damnu kaan hong tangnu thei makka hongtang lat rwe, bakaan sedamnu ding khat chale thei mak eh, bakaan na sebrap tak eh.    

John: Oh! Thou damnu bakaan ding, baning thang luga kriang tak eh, Losiaye!! Nang arwei naosen blei nungai ga kadai bacham thang damnu “karo-kaan” ga kriang tak eh, han hong lat oh kou beida, han hong lat larwe. Ani misa kumle bakaanna se ongnu dan sethou darwe, bakaan nungsuiga bapum brum kalei hongrwe. Bakaan na karonu, losianu le phun honge. Tupai khatna karoga lung onge, tudannu khatna losiaga lung onge.  

Andrew: Oh thou damnu kaan ding baning thangga kriang tak eh! Baan no akum bi swak tamnu meiri kamaga ei raithang rwe. Anu le apa na ating kriang tak eh. Ating New York Namlian bi leirik bachu lang pi khut ong thangrwe. Ash! Baan no! America (USA) ba Super Power choi ongnu, lianthounu Nampung peidam bada nungai tak eh ongle ongsa tak eh. Wasington DC, Chicago, San Francisco, Boston, New York Namlian, khatle Namlian katei katei le nungai loi ye. Nungai bada ani inn ding khat chale baningsu mak eh.   

New York namlian bi bakaan kasem ongnu kaan bi nang dan khak-khaknu kadou ye. 100% nang zwe. Khat chale teinu maak rwe, tida kadou kama bi patni rwei choung kabia kale mak eh. Tiga kakhanne abaan pa John mak pada bo? Abaan pa John dazuba pam toga choung kabia mak nega? Ei bating kadou latnwam nuna ong ngam lan rwe, maan kabia mak peida ei kabia lang rwe diga baning rwe. (arwei ba kadou kale rwe dabi (hug) kapon kale khap-khapnu chaang ga torwe) Kani khat kadou latrwe ei bakim bi hong luga choung kabia makka, hong kapon rwe, kapon khap tida maan na ating kabeng rwe, ei ba ngak rwe, pam to bada ating kabeng ongnu bo diga. Choung kabia kale makka habani tiga se kapaang rwe. Abaan pa ating kabak pada ngak rwe ating kabeng ongba diga baning rwe.  

Kani khat kadou lat eh dabi kabia lat lang mai diga kadou latnu ding ngak rwe. Kani khat kadou latrwe. Hong kapon latrwe hagei le ating kabeng latrwe. Baan no dameng into kou bo ngai bada ameng “rwan ding kapwa” diga kou ye. Hagei na ei kabia lat lanrwe. Hanung bing na kadou kale lat lanrwe…..!! Tiluga ei USA bi citizenship lou luga lung ongnu rwe. A om kamaisia na Chicago rwan ne, naosen kani le am rwe. 

John: (chapka) Baan no na om meiri ngai luga chap maknu ngam mak eh alosia ye. Nang ba nungai takka lung ong ei ba bachansianu bina bachansia kataknu khat toga lung ong, baning luga losia maknu ngam mak eh….!!! Atiga apa le son-ga lung rwe tibriak pina anu na kani khat-khat chara langza karam luga lung thourwe. Ei le naosen dom mai “anu” anao naosennu ding am thangnu kaan ga. Inkhun lungsia briak pina upai maaka, anu ga ngam mak peida anao ding thangsia luga chwan tobalo serwe. Siantui karam serwe. Kani khat chwan tose luga anu balaang ngam mak takka in han hong rwe. Zingphaa nungzai bina thii kalei thou rwe, thii bakhu rwe, insung thiina bakhu sip rwe. Anu riangre ongnu ding ei le phaang ngam lan rwe tida chapnu na makka upai katei khat chale maak. Anu ga riangre takka anao Julias thiitang zanu ding bathan thang luga bakum loithang darwe.  

Atiga anu lungsam thou karang dam briak pina apa le arwei na anao Julias ding anu saruk lin-ga bakot thou rwe, Anao ga anu diga kou lang maakka, apa ding anu le kou apa le kou-ga ong ngak eh.  

Kani khat ei le apa om toksu choi luga nilai lak sakoi serwe. Senu kaan bi tabaat kra kabom na sathangnu hong kadou rwe. Soi makka kabom tabaat kra salang swak lat luzwe diga badung chwan ong rwe, zingram-ram tarwe. Anung la apa ga Anao na cham me diga kabia bada, buh pisa lang le maak, cham ongnu ding ga phaang ngam mak briak pina nilai lakla tabaat kra min ongnu ammo diga zongse rwe, tiga zong senu kaan bi ei na kabom chwan ongnu tabaat kra min ongnu ga hong kadou rwe. Haga mu luga, ash! Asa lang tabaat kra min ong rwada aisa nu rwe diga tabaat kra rai lang lonka khap tinu kaan bi ei ba thei makka kabom swak peina rwe diga toksu kaika luga kaap rwe, apa ga braam pao ga “ash! asa kriangza Julias” hei choung bram 

ngaisu khapnu kaanbi ei ngak rwe, paakhat rwe pam tatonu rubo anya? Kaluk kalat thingkung bina tarwe, phaang bada apa ong ngak rwe. Ngak rwe!!! Apa mik hakna meng rakan ngam makka ong rwe. Mikle karup tamakka ating za phaang luga kathok dun-dun ongrwe. Apa na riangre ongnu ding phaang ngam lan rwe. Ei gianta lan rwe. Upai maak rwe. Ei choung kabia lat ngam lanrwe bakaan kasem apa ding kapon luga chap rwe. Aphaap khat chale swak ngam lan rwe. Kaap thangnu zam bina thiina lwangsip khap, tui lwangnu dan lwang rwe. Tabaat kra kungri thiina lwang san-san tarwe. Ei le upai maak rwe, chapka kabia rwe apa ei soi rwe, laan rwe nasa ating zale kokthang ngo kabia rwe tida apa ga choung kabia lat ngam lan rwe. Apa ding kapon luga chap rwe, zing khit-khit tarwe. Kaphuk kainu dan kaimaknu dan riangre takka kakhamnu choung toga apa na kabia ye nanao Julias lang ga tabaat kra minnu phun hong thang bio kabia luga tabaat kra kungri bi, apa ding kapon-kapon ga apom bi Apa bakum loithang rwe.  

Anya ei ba nupa lung bachang kamaknu taraisa toga lung rwe, anu le apa lungsam thou karang dam briak pina anao le arwei za lung luga rwan chaang sui lung tang ngam makka, karonu le kadou mak, Inkhun lungka ngam makka lung ongnu rwe. Anya arwei om choungren nungsuiga anao ding thangsia luga semaknu zamak briak pina anao khou ei Moscow bi chwan khat am luga semaknu zalan rwe kabia luga hongnu ye anao ga barang tuza balosiaga ong damnu ye. Han hong lat karango, ei han hong latnu ding ngaakka ong damnu ye, Ei hong latnu ding ngaakka ong ngak rwe anao Julias.  

Andrew: Baan no na om meiri ngai luga ei baning ngam lan rwe! Khandamnu ba khan damnu rwe, Hading hen-ga kakkhan luga na-shung riangre shung katop ka ong lat lanro. Ei na ngamnu lang, nalaang bathaang amnu bing ga ei paang thang ne. Anya na thouga shung riangre ga ong lat lan ro. Nang riangre ongbi paang thang makka, intoga ei thiap-thiap ong lang bo? Baan diba khat-khat om riangre thei thangga, khatle Potrit phun paang thang kalenu heiya baan khat na to dingnu thou bahak eh. Nang arwei naosen blei na kriang kale takka bacham thounu baan, naosen kaan bi kriang kale ongnu kriangga khat chale braannu zamak eh. Shungtam mak oh ei amme. 50 thousand US dolar pithang kama rwe. 

John: Ohh!! Baan no, tasiatnu ye! Swanka tak rwe! Ating heitya khak kriang thang ongnu lang na. Na om krianglei ding ei thun lat ngam larwe. Na om krianglei chaak luga lung ong lang ngaak rwe. Nating baan tosunu, alaangbe bachansa kalan lanuye. Baan kakungnu heiya unao male hen-ga saye. Batakseknu baan na riangre kanang tanu kaan bi paang thange. Shung riangre ongnu kaan bi puithange. Karo le karo bachamme, chaple chap bachamme, losiale losia bacham me. Heirwe batakseknu baan, Sakataknu baan zo. Heidan ga baan kasanu, batakseknu baan siantui, sianlan na le kalei ngam mak eh tida Rikrwang om sakataknu leithwan ne.       

                 To be contd...

About the author: 

Nk. Greenson Kaiphun-ga is currently the pastor of Inpui Christian Fellowship, Delhi (ICFD). He has also written a book titled "Inpui Naga Folktales: Thouchiak Thoucha Kama Pupi Meiri" 2013. He writes on the theme ranging from family issues, nature, and tragedy. He has written drama/plays, poem and articles on the aforementioned themes.

He can be contacted at greensoninka@yahoo.com.