Romeo and Juliet |Inpui (Kabui)

Image credit: Dramatica.com

Romeo Khatle Juliet

Place: Verona, Italy

Enemies: Montague and Capulet Family

Romeo: Male Protagonist (Montague)

Juliet: Female Protagonist (Capulet)

Friar Laurence: Priest

Mercutio: Friend of Romeo

Benvolio: Romeo best friend

Tybalt: Juliet cousin

Unnamed Nurses

Rosaline: Romeo lover and Capulet’s niece

Writer: William Shakespeare

Introduction

Kama nana Verona kounu taram bi Montague khatle Capulet kounu inkhun kani am ngaak e. Heiba inkhun kaniya haba tarambi lungsa nu khatle mengse ye.  Atiyeda heiba inkhun kani ya kana ka eh batwan ngaak e. Inkhun katei dan ga kana ka-eh kale le chong kabia bathiang sat nu maktabe kokthang kale nu dinu maak ngaak e. Heiba inkhun kani ya zekna kale nu khatle khat khat ting phaang thang lanu phaang batan kale ga ong ngaak e. 

Lampui lamkhaang bi kadou ngaak le kabia kale mak e atibriakpina kana ka-eh nu maktabe kamai kale nu tam gaswak ngaak e. Heiba inkhun kani zamak ka baswak rwan khatle inkhun doi rwan le heiba inkhun dan khak khak ka pang ngaak e. Banicham baze nu laan nu theimak ka sui kapon kale kale ngaak e.

Lord Capulet Thaisaak (Party/Bukounu) khatle Laam

Lord Capulet, inkhun om patso na party lian nu khat rang swak ngaak e. Haba bukou bi laam nu le sui ngaak e. Maan na Verona bi amnu bing hung zaye diga sunglian thang ngaak e atiyeda Montague mirwan khatchale hung zamak e diga rin indao ngaak e.

Atiga Montague bi babwa Romeo diga kounu katang khat am ngaak e. Maan na heiba party bi suinwam ngaak e balang ba maan na kriang nu rangaak Rosaline ga haba party bi sui lang nge dinu thei ye. Atiyeda Rosaline na Romeo ding kriang mak e khatle bathai mak ngaak e.

Ati ngaakpeida Romeo haba party ni baom baaan Mercutio khatle Benvolio ding kalwang luga hung rwe. Habei hung nu kaan bi bani pathum ding Capulet patso rwan na kadou chui tak thang rwe. Haba party bi hungnu bing na bani om pwansin potnaat velvets, satin khatle jeweled sword hilts le collar thang chuitak ka thang ngaak e. 

Kamaisa rwan na phaangsanu gems bani kachaang bi khatle bani kutpi thang ngaak e atiluga lung kataang nu bani om girdles bi thang nge. Romeo le potnaat thangchui tak ka hung ngaak e. Maan na mask kabum nuna bamik khatle ba naptwang runthang lu sui ngaak e atipeida bamun khatle basam ga mibing na mu we. Maan na hung ong nu katang rwan lakpina saruk somgakanito man sahen ngaak e.

Romeo na Juliet Ding Munu

Image credit:Istock

Mi tamga laam ong nu riakpi Romeo na man sanu rangaak khat ting phaang mu rwe. Haba rangaaknu mengJuliet diga kouwe. Juliet ding mukhap tibi na intun intun kriang ong nu rangaak Rosaline ding khatchale kakhan lat lan rwe. Maan na Juliet na kangounu satin khatle pearls thangluga laam ong nu munu kaan bi basung sok rwe. 

Ba om lungning bi heiba kumeini khou thang ngaak e khatle bating bathai rwe. Maan na heiba kumeini ding bathaiga kabia ong nu Tybalt, Lady Capulet’s om cousin na ngai su rwe. Romeo bamaikum thin ngaak peida maan nab a braam ding thei briak pina basung souga bapaswan khou hung luga intoga Montague katang rwan heiba Capulet om party bi sui hung ong nu bo diga ngai rwe. 

Montague rwan ding kou mak peida hung nu ong nu rwan ding Lord Capulet na basung sou mak lamme atiyeda Tybalt ding baraam tam mak ka thiap thiap ong lang rin dam me.

Atiyeda Tybalt na Romeo ding into ga kana zubo maktabe kamaizu bo dinu lampui zong ngaak e. Ati ong nu kahan bi Romeo na achia mansa nu rangaak Juliet pekla khut tamnu mu rwe. Romeo na Juliet khou hung lung ga “Nang mansa ye, ei nating kriang nge” diga rinluga bating kaput ngaak rwe. 

Ati taang khap nu kaan bi Juliet ting banu (mother) na kou da rwe. Hagei na Romeo na Juliet ah Lord Capulet om basa kamaisa sa rwe dinu thei ngaak e. Atiga maan na basung sok ngaak rwe balangba bani inkhun kaniye zekna kale ga ong briak pina kriang ngaak le rou nu basung bi phao dam me.

Juliet na baom seva tonu (nurse) mannu khou ngai e. “Hei manpa laam mak ka ong ba tubo?” Nurse na katak e, “Bameng Romeo kou we khatle maan Montague rwan ne, na in inkhun na batan katak nu manpa om basa khatchanu sa ga rwe.”

Juliet laam ong nu riakpina ba om ka (room) la khut luga inkhaansa (window) bina kahaang nu ankwat ding phaang nge. Habani thabaan le sa ye. Romeo na haba ankwat om thingkung lakpi inkam luga ong ngaak e balangba maan na Juliet ting phaangmu lat makka ba-in han lat takaat ngaak rwe. 

Juliet na Romeo amme dinu thei makka basung chong barang tuza kabia rwe. Maan nale Romeo ding bathaiye khatle kriang nge diga barang tu tutu rai ong ngak e.

Juliet na kabia ong nu chong bing ga inkam ongnu Romeo na ngaisu luga basung bi karo nu na sip rwe. Maan na inkhaansa (window) thweila inkam ong bariakpina Juliet maikum thabaan baan nu thwei bi baan kaphu ong nu muga karo tak basum pem ngaak e. Juliet om inkhaansa (window) ga kamong ratnu kung na kwat barik loi we. Romeo na heibing mulu bamang la dan ga baning nge.

“Ah, Pam tuda nameng Romeo kou nubo? Diga Juliet na kabia ye. “Ei nating kriang ru briak pina nameng pam am koule bachong mak e.”

“Ating Kriang diga kou wo, ei tuilup kathan nu dan ga ameng Romeo diga kou lat la rwe.” Diga Romeo inkam ong nu riakpina thabaan sanu riakpi swak luga pao ye.

Juliet na balao ngaak e. Atiyeda maan na Romeo we dinu theinu kaan bi karotak ngaak rwe. Romeo na talei la hanlu, Juliet na inkhaansa (window) bi han ga barwei chong kasa kasa kabia kale ngaak e. Talei bi chong banem nu maktabe kathum nu za kathang luga kabia rwe.

Atiga meiri raisei ga rai ngaak peida bakaan thoudam nu theimak ngaak e. Barwei na zingpha ngian ngaak le kapaang lang theimak ka ong nge. Atiga kapaang kaat kaat habani kapaang rwe. Juliet na baom inkhaansa (window) taap luga khut tat rwe. Romeo na ba-in han kaat kaat ka ba-in han rwe.

Meikatha Nu

Louthwan thounu kaan bi Romeo na Friar Laurence kounu Priest khou inzaan Juliet le barwei lakpi swak tam nu meiri ga raithang rwe. Maan na Juliet ting kriangnu meiri khatle Juliet nale bating bathaiye dinu Priest khou raithang rwe. Atiluga Juliet le barwei ding barap katha thang ro diga hwei rwe. Priest na haba meiri ngailuga Romeo le Juliet ting katha thang ba rwe diga rin ngaak e.

Atiga Juliet ba om nurse patso khat ting Romeo khou bathan se rwe. Atiluga thouraang into indan am rubo diga ba-ngai luga Juliet khou han hung latluga, inswan narwei ding katha lang chamdaan loi rwe diga rin rwe.

Heiba babwa kaniza sung chong bariakpina barwei nupa khou rinswak kachi ngaak rwe. Balang ba barwei inkhun kani ya bakhwaseiza zakale makka hung briakpina nupa na zathang laye dinu barwei thei ye.

Atiyeda Frier Laurence naba barwei ding inkam ga katha thang la zathang ngaak rwe. Balangba Friar Laurence na Romeo khatle Juliet ding katha thang taang nge be barwei nupa le bazaang ga zathang dam zwe diga baning ngaak e. Atiluga barwei patni paanbi na heiba inkhun kani lakpi sungcham nu phunhung lu zwe diga balumsa ngaak e.

Atiga inswan louthwan swaklat nu kaan bi, Friar Laurence na Romeo le Juliet ging nga ba om cell bi katha thang rwe. Katha thang taang luga Romeo le Juliet losia ga ba-in ba-in se lat rwe.  Romeo na Juliet khou khwazin bathin ba-in ankwat pi hung ne diga sung katip thang ngaak e. 

Halang chungna Juliet om nurse patso nuna Romeo ding Juliet om insung la inkam ga inkhaansa (window) bina khutza dam lang ruina bacha nu kalaak (ladder) chamdaan thang ngaak e.

Atiyeda meikatha ni chongla kungnu khat swak ngaak e.

Tybalt Thi Nu

 Tybalt, Romeo ding zamak nu manpa gana Romeo khatle babaan kani Mercutio and Benvolio ding lampui bi kadou luga bweikale lang pa rwe. Romeo naba Tybalt ya Juliet om unao swak briakpina bweikale kaat e atiyeda Mercutio na chem kaiswak briakpina Tybalt le Mercutio bwei kale luga Tybalt na Mercutio ding athat thang rwe. Romeo na babaan kriang nu ding Tybalt na tothat thang briakpina balung pwan rwe. Atibriakpina Tybalt le Romeo bwei kale luga Romeo na Tybalt ding athat thang rwe.

Romeo Ding Kazun Sat Nu

Romeo bamei katha bani maan na Juliet om unao khat ting tothat thang briak pina bating haba inwan bina kazun sat rwe. Romeo le Juliet habani zingpha kadou kale rwe. Maan na kalaak (ladder) pina kalu ga Juliet om kala (room) khut rwe atiluga barwei losia losia ga khatle mikthi san rwe. Barwei ga inpha na kadou lat ding bo diga sung riangre ga kapaang rwe.

Juliet pa na Juliet ah Romeo lang katha taang rwe dinu meiri thei mak briakpina Paris diga kounu katangpa khou katha lang za thang rwe. Juliet na Paris khou lung kaat e diga bapa chong takan ga kabia nu kaan bi Juliet pa ga bathoisia ngaak rwe. Juliet na barang toza chongso zalan ruga Friar Laurence, khou pakse luga into lang rubo diga ba kathui rwe. Friar Launrence na Paris lang za nu katap tu wo diga Juliet ding kachui thang rwe.

“Atiga eina nalaang lou (medicine) khat pine, haba lou inne be nang nini (two days) thinu dan ong lune, atiga nating rupkathan (church) la kalwang hungnu kaan bi nating katha nu (wedding) tomak ka nating uithanglang/rithang (funeral) lang kalwang hung lu rwe. Banina nating thingku bi thang lune, nang meng thou lat mak aang balei na Romeo le arwei na nating seba to ong dam rwe. Nang hei to ne bo? Nang to raang khap bo?”

Juliet na katak e “Ei tone, akhou kachi nu om lang bi kabia mak o.”

Hei chong kabia kale luga Juliet ba in han lat rwe. Juliet na bapa khou Paris lang za thang rwe diga rin rwe. Lord Capulet na heiba chong ngaisu nu kaan bi karo tak rwe. Maan na meikatha lang babaan khatle ba-in inkhun mibing ding talot thang rwe. Habani ba-in inkhun bing zingpha inmak ka inswan Juliet ding katha lang chwan tamga to ngaak rwe. 

Lord Capulet ga karotak ka ong ngaak e atiyeda Juliet ba Romeo ding kakhan luga balo siaga ong ngaak e. Lord Capulet na Juliet na losia ong nu heiya, Tybalt braan dam nu ding hwei ong nu ngaak ne diga kakhan ngaak e.

Aisia Nu Thoudok

Image credit: SchoolWorkHelper

Louthwan karang nu dat pi nurse ga Juliet kabi (room) khutluga Juliet ting tazwan katha lang pwansin potnaat chamdaan thouro diga rinlang khut rwe. Atiyeda Juliet ka insaang thou thang bi lan rwe. Nurse gana balaoga Juliet thi da rwe diga pao rwe.

Lord Capulet ka Juliet ka(room) bi pak khut rwe. Lord Paris khatle mi katei katei le Juliet thinu cham theinu kaan bi pak hung kadoi rwe. Juliet bakatha suimak ka thi ong nu mibing na mu rwe. Atiga Juliet ting ri (funeral) lang chamdaan thou lat rwe.

Ati ong bi Friar Laurence na Mantua la Romeo khou che khat bathan ngaak e. Haba che bi Juliet le barwei na chamdaan ongnu bing ga hiak thang ngaak e. Atiyeda haba cham ga hung tam mak sia dam me.

Chamsia nu cham ma thei brap e. Romeo om swakrwan (servant) na Juliet le inkam ga meikatha nu om meiri ga theiye. Atiyeda Juliet na thithiaam (fake death) nu om meiri gaba thei mak ngaak rwe. Atibriakpina Mantua le seluga Romeo khou namei Juliet ka thi da rwe diga cham barin thang ngaak rwe.

“Batak po chamzo?” diga Romeo na baswak khou ngai ngaak e. Atiyedabe eile aniya Juliet kombi sui in ne diga kabia rwe.

Romeo na hu (poison) ba kalei rwe atiluga Verona taram la pak hung rwe. Maan na Juliet in ong nu riakpi hung rwe. Juliet ting thang ong nu om inkhaan kadeng rai luga Juliet ting thang ong nu ka (vault) la ta rwe. Maan na tadam nu Paris na thei rwe, Juliet ting katha thang katinu manpa Paris ga na “nang Montague, pa-am lang agei hung luga, Capulets in mi thi ong nu riak pi hung nu bo?”

Romeo na Paris ting bazaang ga bathem lang to we.

“Nating Verona bi hung lat e be athat sat ne diga rindam nu mak bo?” diga Paris na Romeo khou ngai e. 

Romeo na “ei agei ya katei lang hung nu mak e, kasanu, bazaang nu katang, ating bathan thang ngo. Sero, ei nating sok mak balei. Ei nating-ating kriang nu ma kriang nge, sero, ating agei hoithang sia ro.”

Atiga Paris na rinne “Nachong lou mak e, nating nga kakoinu mi (felon) khat toga eina nam nu rwe.”  Romeo na basung souga ba-om chem kaiswak luga barwei kamai kale rwe. Romeo na bating chem kasei nu na kathin nukaan bi Paris na atiga kakham nu toga bating Juliet om thingku bi thang karung lang rin ngaak e. Romeo na ei tu thang ne diga katak e. Habei Paris ting Romeo na athat thang rwe.

Romeo na Paris ding pon khut luga Juliet ting thang ong nu riak pi phun hung rwe. Atiluga bakekhok detaga (kneel down) Juliet ting kabia rwe khatle bakut pom bi pon kriang ga kaput thang rwe. Ati ong nu sing bi Juliet ka bazaang bazaang ga basung la barak swak lat na rwe. Romeo na Juliet thi tak rwe diga lou briak pina Paris le Juliet kombi huga (poison) inluga thi thang darwe.

Friar Laurence na taluga Romeo hu (poison) inluga thi ong nu taphaang mu rwe. Ati ong nu sungbi Juliet le ba om lou om bahu ga cham ta briakpina brak thouswak lu phaang nu kaan bi Paris le maan na kriang nu babasan Romeo bakom bi thi thang ong nu mu rwe.

Atiga mi kana ka-eh nu khwan mi rwan na ngaisu briakpina mi katei le haba riakpi pak hung rwe. Friar Laurence ga kachiluga Juliet dingza habariak bi hoithang sia rwe. Juliet na Romeo ya hu (poison) inluga thi darwe dinu theirwe. Maan le huga inlang phaang nge atiyeda Romeo na in loi dam briakpina Romeo om chem ka-ngai nu gana barang to basung bi chou luga Romeo kom bi thi thang rwe.

If you like this article or have anything to share, comment below or write to us at isaacnka@gmail.com

For more on Inpui culture visit Antrimwanbut Khwan, a vlog on YouTube.