Kabom le Zulei Meiri|Thouchiak Thoucha Kama Pupi Meiri|Inpui (Kabui) Folktale

Bakaan khat pi pang taknu Kabom khatle ningting nu Zulei pai to chui taknu am ngaak e. Atiga kani khatpa Kabom na meidung pui khat pi bazuzangkatin kra thang sip luga phun se ungnu Zuleina phaang mu rwe. Zulei na ha phaang mu luga chalak khat kadai rwe.

Zulei na Kabom khou rin rwe, “apaiba, ei abon na tak e ating phun thang ngo”. Atiga rinnu kaan bi Kabom na “atidabe a-om meidung sungbi khut ung ro” diga rin rwe. Zulei karo takka khut ung rwe. Zulei na khut ung luga Kabom om thakra ga sa thou rwe. Maanna balu chung la amnu bing saloi luga Kabom khou rinne, “apaiba, kathok kalat thang ngo, kathok kalak e be a bon nanu sa domme”. Kabom na bapaiba bon nanu sa dom me diga rinnu kaanbi kathok kalat thang rwe.

Kathok kalat thangnu ga saloi lat pei rwe atiga badop la tangga saloi thang luga zulei ga kacahk swak ta rwe.

Ntunba Kabom ga ba-inn hung tang luga karo takka ba sa rwan ding “barapui pha taro” diga rin rwe. Basa rwan na bara pha tanu kaan bi thakra ngong karwak bun ta rwe.

Atinu kaan bi Kabomna “eh, apaiba chwan sa mak e” atiluga sui kazun sui lat rwe. Sui kazun sui lat nu kaan bi Zulei ga baroksi min sensen nu choiluga ungnu  mu rwe. Kabom na “apaiba eile sui choi bade” diga ngai rwe.

Zulei na katak e, “apaiba, heiba ri om zung nge. Nang sui choi za laye”.

Kabom na, “atibeida eile sui choi bade” diga rin latnu kaan bi Zulei na, “atidabe inka eina uh la mangna za rwe diye be heiba baroksi ya bazai bina thiak tut luga da mik pi chou thang ngo no’ diga rin rwe.

Kabom na, “eh” diga katak rwe.

Atiga zulei na uh la se luga “za rwe” diga paonu kaan bi Kabom na baruksi ga thiaktuk luga bamik pi chou rom thang rwe. Chou rom thang bada bamik sa luga zulei ding “apaiba, taan sa mak e, sui kazun lang maang zwe” diga sui kazun lat rwe.

Kabom na Zulei ding ga sui baang hung latnu kaan bi Zulei ga khwei kabu ding de tuga kachum kadai ung ngaak lat rwe. Atinu kaanbi Kabomna kabia ye, “apaiba, ei le sui kachum de”.

Zulei na katak e, “eh, apaiba ri om zung nge. Nang sui choi za laye”.

Kabom na, “atibeida eile sui choi kamde” diga rin lat rwe.

Zulei na zala ye di peida Kabomna sui choi de diga rin lat lat rwe.

Zuleina, “ati dabe sa rwe, inka eina uh la mang na za rwe atiyebi heiba khwei kabu ding pha lang kachum mo no” diga rin luga uh la mang na Zuleina “za rwe” diga paonu kaan bi Kabomna pha lang kachum rwe. Atinu kaan bi khwei kabu kachum phak thang luga khweina Kabom ding ei katat rwe.

Kabom na, “apaiba taan siaye aniya le baang lat lang maang zung nge” diga sui kazun hungnu kaan bi Zulei tuili lu sip pi ruizem khat kai zwaang kadai ung nu mu rwe. Zulei na ruizem kai zwaang ungnu mu ga Kabom ga sui kai zwaang nwaam thou lat rwe.

Kabomna, “apaiba eile sui kai zwaang de” diga rin rwe.

 Zulei na, “apaiba, ri om zwe. Nang sui choi za laye” diga katak rwe. Atinu kaan bi Kabom na katak e, “ati ngaak beida sui choi kam de apaiba” diga bathem rwe.

Zuleina, “atida be nang na pum rit luga ei alamang khet thang chui mang nge no”diga rin luga bakom la swak luga bachip chat nana thang luga ta rwe. Taluga maanna, “apaiba eina za rwe diye be kachak swak luga swak kai zwaang ngo no” diga rin  thang luga Zulei ga se inpaan dom swak luga, “za rwe” diga pao rwe. Zulei na “za rwe” diga paonu kaan bi Kabom ga karo takka kachak kalu ga swak kai zwaang nu kaan bi rui ga kai chat ta luga tuili sung la phet talu ga thi da rwe.