Magi Om Leithwan (The Gift of Magi)|Translation

https://thecultureconcept.com

Kama James (Jim) khatle Della Dillingham kounu sungram khat lung riang re nu inkhun khat am ngaak e. Christmas hungna rwe atiyeda barwei kutpi sian toga dollar khat le somkariat sarito cents za am ngake. Hagei na somrup cents heiya pennies zwe. Karoga pennies khat mo kani suan suan, anpek anna zon bina khom ngaake. Della sian ga paleng inthum meda sian singa dollar khat le somkariat sarito cents za am ngaake. Christmas heiya naitak hung narwe. Upai maak ka hungke bi  losiaga ong ngaak eh. Kum heiya losia chap owei, karo banui owei nuwe dinu Della baning ngaak e tida losia chapnu na tamdom ngaak rwe.

Inn ding phaang bi, flat kasanu, hapta bi dollar kariat pinuwe. Tida inpu nu haiya losia nuna maikum zingkhit khit ong rwe. Lungsia khaisa senu mi mak eh ‘tida sian maakka upai maakka ong ngaak eh.

Letter box room khatla, letter hungtei maknu box khat am ngaak eh. Hakim bi electric button mi num na baraam tai maknu amme. Haba room inkhaan sakbi meng “Mr. James Dillingham Young” diga hiak thang ngaak eh. Dallingham inkhun lungsa dom ngaaknu kaan bi tha bi dollar somthum piluga haba inn bi hung lung rwe. Tida inkhun sian hungnu dollar somni za ta rwe, inkhan sakbi hiakthang nu meng le mu bathaing lan rwe. Mr. James Dallingham Young na ba inn hung tang luga bating “Jim” diga kou we. Bamei Mrs James Dillingham Young, Della diga kounu nale bating kapon ga kadou thang nge. Tiga karoga lung ngaak eh.

Della chap taanglu bameikum powder na tobathiang lu munthong (window) kimbi ong ngak rwe. Phaang swaknu kaanbi, toksa angkuat kimbi angkuat thing le diga bachu bachamnu phaang mu rwe. Maanna atiga baning ngaak eh, “inswan Christmas rwe akhou dollar khat le somkariat sarito za am, ei Jim lang pa-am kalei thang langbo?” Maanna sian thoulam nu tha lana kom  (save) ngaak rwe. Christmas bi Jim lang pot kalei lang diga. Tida siansing haza am ngaak eh. 

Hapta bi dollar somni na khop mak eh. Barwei na hapta bi choinu somni henting ting ngaak eh. Atida bakhou dollar kani hakna tang mak ngaak e babasan Jim lang Christmas pot kalei thang lang. Thoulam nu thabi karo ga, Christmas bibi Jim lang pot kana nu khat kalei thang lang rwe diga baning ngaak eh. Pot sanu kungnu mak peida balaang kananu, maanna karoga sizin zanu pot loulang diga sian khom ngaak eh. 

Window om katha’an (miiror) baron nu bina bathot phanglu karo tak ngaak e. Bameikum le bamik pakka phaangsa tak ngaak eh. Atida bameikum maithan danga banim (smooth) lan rwe. Atiga katha’an kimbi hanga basam sut choi phaang rwe. Basam khaak nu lousat nu kaan bi, sam kaseikhak ta rwe. Sam phaangsa takka seiga bakot thang ngak rwe.

Dillingham inkhun bi potchak kakungnu kani am ngaak eh, inkhun na bakung toga thang ongnu. Khatna Jim om kachak pung, baza (strap) maakda khap zamaknu pung, bapa le bapuna khak ngaknu pung nge. Tilao diga khatna Della sam sei sanu, kachat tei maknu. Krwangnu Sheba ong kacha lupa male kung nge. Krwangnu Sheba om bakaan biye bi, Della le basam window bina pita lu Sheba om kachak pimu nu danga pimu lune. Krwang Solomon om lan male Jim om kachak pung na sa inkuwe. Solomon le Jim om pung ding phaanglu bathai tak ong lune.

Della sam phangsa takka tabung (waterfall) dan seita ye. Baket khok tangga sam seita lu ba-om pwansoi dan ngaak eh. Della ba-in bina ba-om brown zanmun (leather) jacket le luthop thanglu se swak rwe. Atiga lampui bi se ong bi, bariak khat bi hung hanlu phaangnu kanbi sam om dukaan (shop) am ngaak e. Sam chaat (types) bing kalei nu dukaan ne. Della na khutlu ngai ye, “Asam kalei (buy) ne bo?” diga. Dukaan pubana (owner) rinne, “ei sam kalei ye. Luthop (cap) lousat o, nasam phaang zo”. Luthop lousat khap dida, Della sam tabung (waterfall) danga ta rwe. 

Dukaan pubana rinne, “dollar somni pine na sam lang”. Della barap ga katak eh, “piro” diga. Pung kani tangbi, Della sam kachat loilu dukaan teila se lat rwe. Pung om dukaan khat bi hunglu pung baza/barui phang rwe. Mana baning ngaak eh, hei dukaan heiya Jim lang bacha thangnu dukaan ngakne diga. Pung om baza satak taknu tamga amnu phang mu rwe. Platinum om pung baza kasa nu khat hung lou rwe. Maanna baning ngaak eh, “hei baza haiya Jim om kachaak pung bi lang pak ting rwe” diga. Jim lang bacha thangnu hakrwe diga lou ngaak eh.

Dollar somni khato pilu platinum om baza ga loulu in han hung rwe. Jim anibing thouga bakaan sizin chui ding rwe, company bi ngaakle tei tei bi ngaakle diga Della na baning ngaak eh. Dollar somsari kariato choilu in han hung rwe. Della in hung tang bi, in bi om chwan swan swan to thou rwe. Mei tobaan lu in to bathiang thou rwe. Bangiam ta takka, Christmas hungna nu ding ngaaka, in to bathiang thou rwe.

Pwanna balu kabet lu katha’an bi barangto minute sombali khak hanlu phaang ngaak eh. Bathot school kanu naosen danga am ngaak eh. Barangto baning ngaak eh, “Jim na ating lwaan basiat ting rwe athot phaanga, Jim na aniyaa ating that ding rwe”. Atida baninge, “ei pam to ngam nega, dollar khat le somkariat cent na. Pam kasanu pot louthang ngam nega?”

Pung sari ta rwe, coffee bacha loirwe. Kasa ka-in le bacha loi rwe. Salang chamdaan thang rwe. Jim in hungnu ding ngak ong rwe. Jim in han hung nu ngian tei mak eh. Atida habani bakaan bi hung mak eh. Della inkhaan kimbi babasan hungnu ding ong ngak ong me. Kanaknu kaan bi, Jim hungna nu kekaam baraam ngaisu thou rwe. Della namtu khat nervous kalu bapham baraang thei mak ngaak eh. Della kanibathin toinu kalum kalum ting ting ngake. Jim khut mak blei le kalum dam swaan khat kalum ngaak eh, kachai ga ong ngak eh. Della na kalumme, “Rikrwang Jim na ating nga phaangsa mai diga pi baning thang ngo”.

Inkhaan lat lu Jim khutlu inkhaan khaanlat lamme. Balaang satak mak danga bathot zing zing ngaak eh. Sangwan somni kanito zamai inkhun om riangre na maikum pizing lang. Jacket kathan balaang bathaang amme atilao diga ba-om kut thop le basiat loi rwe. Kaling ngam mak danga insung bi khut rwe. Bamik na bamei Della ding phaang ongme. Della na phaangbi babasan ding giaan ta ngam makka kachi takka ong ngaak eh. Sungsia nu thot le mak, ngaknu thot le mak, zamake nuthot le mak, Della na kachi ga baning ongnu gale mak. Tida Jim thot teithak thakga Della ding phaanga ong ngaak eh. 

Della na Jim khou hunglu chapga rinne. “Darling, ating ha dan ga phaang mak-o, ei asam kachat lu zon da rwe. Christmas bi nalaang leithwan kaleithang makka bangei ngam la briak bina asam zonlu nalaang leithwan kalei lamnu rwe. Asam mong lat lamzwe, khatchale baning mak-o. To mak zamak briak bina zwe. Asam mong barap tak nu zwe”. “Merry Christmas rinlu karoga bangei bachamzo. Nang theimak bada rwe, intia sanu, phaangsanu leithwan nalaang kalei hungnu,” diga Della na kabia ngaak eh. 

“Sam kachat lam rwa?” diga Jim na ngakka ngai ngaak eh. Khatchale gianta maknu danga lolo ong ngaak e, “Jim, kachatlu zonlam nurwe” diga Della na katak eh. “Ei sam toilam baida ating kriang mainu” diga Della na Jim khou ngaiye. “Sam toilam beida eiba khat peipei numaka” diga rinne. Jim ngakka room ding phaang kwat rwe. “Nang nasam mak rwe dinu”, diga louthang ngam maknu danga ngailat rwe.

“Phaanglat mak peida za rwe, zwan lam zung rwe, maak rwe” diga Della na rinne. “Christmas khwazin hung rwe, sungsia mak o. Ating sa ga tothang ngo. Nalaang sazalang ei asam zwan lam nu zwe”. Della le nu-ngai makdom ga rinne, “rwanna asam basing paza ngak zwe, tida eina nating karingnu mikhat chalena pangam la ye”. 

Jim le ba-om lungning hunglat rwe. Ba-om jacket kaseinu khao bina pot khat louswak lu table bi thang rwe. Jim na rinne, “baning kabak mak o, sam kachat bina, timaka lubwat bina ei amei ding kriang mak ong ne bo? Khatchatle kachat maak ngaakle, kriang nge, natingza kriang nge. Tida nang a-om potga phaang nge bi theilune, pamto da ei sungsianu danga lolo ong nubo?” 

Della na bazaang ga Jim om pot sutswak phaang rwe. Della karoga paowe. Tida khudak bina bathot kale lamme. Thiap thiap onglu chap thou rwe. Samkhaak kasanu phaangsa nu Jim na Della lang kalei hung thang nge. Della na banignga khatle bathaiga ongnu samkhaak kalei thang rwe. Tortoise om balip khatle kachaak suinap thang nu na bachanu samkhaak eh. Della samle diga pak tak dingnu samkhaak ngaak eh.

Baman kungtak nuwe dinu Della le theiye. Basung kalan lamangna bathaiga, inpha na a-om to ding bo diga baning ongnu pot eh.. Atun ba ba-om rwe tida khaak dingnu sam gaba mak rwe. Samkhaak ding kaponga chap ngaak eh. Bazaang ga Jim ding phaang rwe, banui likzum zumga rinne, “asam mong barap taknu zwe” . Della karo ga kachok katat rwe.

Jim ba-om phaangsa nu leithwan phaang mu mak ai. Della na bakut bi choilu karoga Jim khou pirwe. Della na kalei nu pung baza phing phingnu ga Jim khou pimu rwe. “Jim, phaangsa makbo?” diga ngai rwe.  “Heilang chungna ei dukaan bing bi phanagse nu rwe. Ani na thou ga nang pung phaang leng raza khat lang zung rwe” diga rinne. “Na-gom punga piyo, phaangsa mo diga ei phaang nwam me” diga Della na ngai rwe. Della choung zeimaka kongke bi ongta luga banui rwe.

Jim na rinne, Dell hei christmas bibi arwei om leithwan ga bariak khatla kaithou trizo. Salai lu atun tun sizin lang bataiye. Eile a-gom punga zonlu sian gana nalaang samkhaak kalei nu rwe diga kabia rwe.

Conclusion:

 Thei ongnu zong nge, magi nun heiya ningting nu zong nge. Tasiatnu ningting nu zwe. Bani na naosen Jesu lang leithwan kasanu phun hung thang nge. Bani om thoudok bina Christmas leithwan pikale thou rwe. Ningting briak bina bani om leithwan le kasa nu zong nge.

Jim le Della le barwei om kasanu piswak lu khat khat lang kana dingnu kasanu leithwan kalei thang rwe. Leithwan pikale nu rwan lakpi barwei na ningting katake. Barwei le Magi ye.

 The Gift of Magi was written by O.Henry in 1905. 

This story of Christmas was translated into Inpui by Aron Riamroi. It is indeed very encouraging to see his enthusiasm in this field. We would like to wish him more success in his works. 

If you have any stories to share, write to us at isaacnka@gmail.com.